گۆڤارا مەتین گۆڤارا مەتین
مەتین وەرمێلی
د مێژوویا مللەتێ مە دا، بەردەوام مە بەرەڤانی ژ خۆ و ئاخ و کەرامەتا خۆ کریە، هەردەم مە گوهـ ل چیروکێن شەر و داستانێن پێشمەرگەیێن قارەمان بوویە، ل دژی زولم و ستەما دوژمنی، و بەرەڤانیکرنێ ژ ئاخ و ولاتێ مە، بەلێ مە کێم یا گوهـ لێ بوویی دەما ل دەستپێکێ کەسەک دبیتە پێشمەرگە و ئەو ژیان و ژیار و زەحمەت و دەردەسەریێن راستی وان دبن، زۆرا گرنگە ئەم بزانین چ زەحمەتیەک و تێکوشانەک هاتیە کرن، تا کو ئەم گەهشتینە ئەڤرۆ و ڤێ ئازادیێ، د پەرتووکا “لسەر رێبازا پێشمەرگەیی” یا نڤێسەر و پێشمەرگەیێ شۆڕەشا گولانا پێشکەفتنخواز “ئیحسان ئامێدی”، کو باس ل زاروکینیا خو دکەت، و هەتا بڕیارا بوون پێشمەرگە ددەت، و تا کو وەک پێشمەرگە دهێتە قەبویل کرن. هەر چەندە ناڤبری د پەرتووکا خۆ دا باسێ زۆر داستان و مەشقێن سەربازی و هەتا ئەنفالێن ڕەش و سەرهلدانا پیرۆز ژی دکەت، بەلێ یا سەرنجا من کێشایی دەما کەسەکی بڕیار ددا ببیتە پێشمەرگە و هەتا د هاتە قەبویل کرن، کو ب راستی ژیانەکە هەژی خواندن و زانینێ یە.
ئەڤ پەرتووکە ل سالا ٢٠٢٣ێ ژ لایێ ناڤەندا خانی یا رەوشەنبیری و راگەهاندنی ڤە هاتیە چاپکرن، و نڤێسەر ژیانا خۆ، هەر ژ دەما زارۆکەکێ ساڤا و هەتا دبیتە پێشمەرگە زۆر ب هویری باس دکەت، براستی جهێ سەرنجێ یە، مرۆڤ بزانیت دەستپێکا کەسەکی دەما بوویە پێشمەرگە د شۆڕەشا گولانا پێشکەفتنخوازدا، ژبەر کو هەر پێشمەرگەیەکی چیرۆک و سەرپێهاتییێن خۆ یێن هەین، کو د چەندین نەخۆشی و دەردەساریان ڕا دەرباس بوویە، و زۆر جاران روحا وان لێ بوویە بەلا و هەتا شەهدا مرنێ دایە، بەلێ خودێ زڤراندینە، د ڤێ پەرتووکێ دا دێ پتر گرنگیێ دەینە بیرەوەرین نڤیسەرێ پەرتووکێ، و وان نەخۆشی و دەردەسەریێن ب چاڤین خو دیتین تا د پێشمەرگایەتیێ دا بنەجهـ بوویی، کو تێدا رۆلێ چیایی و شەڤێ و خەلکێ گوندا زۆر باش دیار دبیتن، ئەڤە ژی بەرچاڤ رۆنیەکا باشە بو مە هەمیان.
ناڤێ نڤێسەر و پێشمەرگەیێ قاڕەمان «ئیحسان عبدالله قاسم»ە یێ کو بەرنیاس»ئیحسان ئامێدی» ژ دایک بوویێ سالا ١٩٥٩ێ یە.
ناڤبری دبێژیت: دەیکا من بۆ من ڤەگێرایە، کو ئەز یێ ب شیر بووم، دەما شورەشا ئەیلولێ دەستپێکری، و ل باژێرێ ئامێدیێ بو شەڕ، پاشی بانگ هەلدێرا و گۆتن؛ باژێری بەردەن دێ فرۆکێن حکومەتێ ئێن و باژێری بومبە بارانکەن، مە تو کریە د سەڤیکەکێ دا و لسەر پشتا دەواری دانایی، و ئەو قودیکا شیری یا بتنێ ژی تە هەیی، مە لبەر تەنشتا تە دانا و ژوردا بەرەڤ چیایێ گارەیی مە دا ڕێ.
ئەڤە ئێکەم نەخۆشی و دەردەسەریا ناڤبری بو تویش بوویێ، کو هێش یێ ب شیر تامکرە نەخۆشی و دەردەسەریێن کوردایەتیێ.
ل سالا ١٩٦٦ێ بوویە قوتابی ل پولا ئێکێ سەرەتایی، و دبێژیت: زێدەباری هەبوونا شەری دناڤبەرا پێشمەرگەیی و حکومەتا فاشیستا عیراقێ، و زەحمەتیا بارێ ژیانێ و ژیارا ب کوتەکی، بەلێ من بەردەوامی دا خاندنا خۆ، سەرەرایی هندێ، کو پتریا ماموستایێن مە عەرەب بوون، و یێن کورد ژی ب عەرەبی د ئاخفتن، ژبەر کو خاندن ب عەرەبی بوو، و هەر دگەل خاندنێ مە کارێن مال ژی دکرن، و پەز دبرە بەر شڤانی، و چێل دبرنە بەر گاڤانی، ڕێچال دبرە بازاری، و پاش د چوومە قوتابخانێ، بەلێ دگەل هندێ مە یاریێن زاروکینیێ ژی ژ خۆ نەدکرن، وەکی بڕانێ و کێلوبێلانێ و تیسانێ و دارکوپلیتکانێ و تەپانێ چوونا بەر چیچکا و ..هتد.
ناڤبری دبێژیت: هەر ل سالا١٩٦٦ێ مە زانی، کو فرۆکا سەرۆکێ عیراقێ»عبدولسەلام عارف»ی یا کەفتی و یێ هاتیە کوشتن، کەیفا مە گەلەک هات، ژبەر کو مرۆڤەکێ خراب بوو، و ئەم ب هیڤی بووین کەسەکێ باش بهێتە سەر حوکمی، و دگەل کوردان پێک بهێت.
زێدەتر دبێژیت: بیرا من دهێت، هێزین پێشمەرگەیی، سەنگەرێن خۆ ل دەوروبەرێ ئامێدیێ و چێکربوون، و ب گشتی ل دەڤەرێ سەنگەر ل دوژمنی گرتبوون، و شەر دناڤبەرا پێشمەرگەیی و حکومەتێ رویددا. مە د مالدا رادیویەکا مەزن هەبوو، هەڕ شەڤ ل دەمێ پەخشا ئێزگەیێ دەنگێ کوردستان دەستپێدکر، مە ب نهێنی ڤەدکر، و گوهداریا دەنگوباس و گۆتار و سرودان دکر، و رۆژا پاشتر مە بۆ هەڤالان د گۆتنەڤە. حکومەتێ چاڤدێریەکا گەلەکا توند دانا بوو سەر باژێری و قەدەغە بوو ئازوقە و دەرمان و سوتەمەنی ژ باژێری دەرکەڤن، دا چ تشتەک نەگەهیتە دەستێ پێشمەرگەیی، بەلێ ڕێکخستیێن نهێنی و گوندیێن دلسوز د هاتن و دەنگوباس و داخازیێن پێشمەرگەیی بو بابێ من د ئینان، و ل پێش چاڤێن من توڤجا و دەرمان د ناڤبەرا کورتان و بەرپشتا دەواری دادنا و د ڤەشارتن و د هنارتن.
د شەرگەها شەڕی و سەختیا بارودۆخی و ژیانێ دا، دەنگوباسێن دانوستاندنا سەرکردایەتیا شوڕەشێ و حکومەتا عیراقێ بەلاڤ بوو، و شەڕ هاتە ڕاگرتن و پێکهاتنا یازدەی ئادارا سالا١٩٧٠ێ ژێ چێبوو.
بو من ژ وێ خۆشتر نەبوو، هێشتا ئەز زارۆیەکێ دەهـ ساڵی بووم، دەمێ رێککەفتنا ١١ی ئادارا سالا ١٩٧٠ێ، د ناڤبەرا سەرکردایەتیا شوڕەشا ئەیلولا نشتیمانی ب سەروکاتیا بارزانیێ نەمر و حکومەتا عیراقێ ل وی سەردەمی هاتیە ڕاگەهاندن.
شوڕەش و پێشمەرگە ب سەرکەفتن، کەیف و خۆشی گوڤەند و شەهیان و خوپێشاندان هاتنە گێران.
پشتی رێککەفتنێ ب دەمەکێ کورت، هێزین داگیرکەر پاشڤە زڤرین، و دامەزراوێن پارتی دەستهەلات وەرگرت و کار و بار برێڤە برن، چارسالێن ئازادیێ مە دیتن.
دگەل هندێ چالاکیێن پارتی و رێکخراوێن جەماوەری و پیشەیی ب تایبەت ئێکەتیا قوتابییێن کوردستانێ و ئێکەتیا لاوێن دیموکراتا کوردستانێ و ئێکەتیا ئافرەتێن کوردستانێ و ئێکەتیا ماموستایێن کوردستانێ و سەنیکا کرێکاران، ب ئازادی د هاتن ئەنجامدان و یاد و بیرەوەری و هەلکەفتێن نەتەوەیی و نشتیمانی و پیشەیی ساخ د کرن.
ل ئادارا ١٩٧٤ێ دەنگوباس بەڵاڤبوون، کو حکومەتا عیراقێ پاشگەز بوویە ژ رێککەفتنا یازدەیی ئادارێ، و شاندێ کوردی ژ بەغدا زڤریە ڤە و پێکنەهاتنە، و دێ بیتە شەر، ئێدی پێشمەرگەیی کارێ بەرگریێ کر و خەلکی ژی بەرێ خو دا ئاقاری، دا ل دول و گەلی و شکەفتان دا خۆ ب پارێزن، و هەڤالێن پارتی ئەوێن ل ژێر دەستهەلاتداریا حکومەتا عیراقێ ڕەڤین و قەستا کوردستانا ئازاد و بنگەهێن شوڕەشێ کر.
شەڕی دەستپێکر، وفروکێن شەرکەرێن دوژمنی ل سەر دەڤەرێ ڕا د هاتن و هندەک جهـ بومبەباران کرن، و ترس و سەهم بەڵاڤ بوو.
ل بوهارا سالا١٩٧٥ێ، گۆتن صەدام و شاهـ پێکهاتن.
ژ وێ نەخۆشتر نە بوو، ئەز گەنجەکێ پازدە سالی و من دیت شەر ڕاوەستا و شورەش ب دویماهیک هات، پێشمەرگەیی هەمی بەرۆکێن بەرگریێ بەردان و پاشڤە زڤرین، وێنەیێ رێبەرێ کورد وندا بوو، هێزێن رژێما داگیرکەر دەست بسەر دەڤەرێ دا گرت، گەلەکا نەخۆش بوو، دەما ژ مال دەردکەفتی، بەری هەر دیمەنەکی ببینی، چاڤ ب زڕتەکێن دەزگەهێن سەرکوتکەرێن ڕژێمێ بکەڤیت.
ل وی سەردەمی، داگیرکرنێ هەمی بیاڤ و دەزگەهێن کوردستانێ داپۆشی بوون، ژ داگیرکرنا وەڵاتی و مرۆڤی و ئاخفتنێ و روشنبیرییێ، ل هەر جهەکێ ژیان لێ هەبا سەنگەرەکێ داگیرکرنێ و سەرکوتکرنێ لێ سەپاند بوو، مرۆڤ د هاتە کرێتکرن و کێمکرن ..!
من هەست ب چەوساندنا نەتەوەیی کر، و ئا د وی دەستوداری دا هەستا کودایەتییێ ل دەف من ئاریا و من هەڤڕکییا وان سیاسەتا کر.
ل سالا»١٩٧٧»ێ ئەز ل ئامادەیا پیشەسازی ل دهوکێ هاتمە وەرگرتن، و هندەک پەیوەندییێن نوی یێن هەڤالینییێ ل سەر بنەمایێ دلسوزیێ بو کوردستانێ مە دروستکرن، بزاڤەکا هزری و سیاسی ل دەف من چێبوو، هەڤال «غازی فەرمان» نامیلکا»رێبازا بزوتنەوەیا رزگاریخوازا کوردی» داف من، و گۆتە من بخوینە و بو مە ڤەگەرینە.
ل سالا»١٩٧٨»ێ من پەیوەندی دگەل رێکخستنێن»پارتی دیموکراتی کوردستان»دروستکرن، و چاپەمەنی وبەڵاڤوکێن پارتی و شوڕەشا گولانێ د گەهاندنە من، من ژی ب رێکێن خو بەڵاڤ دکرن، و ل بیرەوەریێن نەتەوەیی دا، مە ب جلکێن کوردی خۆ د خەملاند و خوپێشاندان دکرن، و دروشم و سرود و سترانێن کوردایەتییێ د گۆتن.
ئەز قوتابیێ ئامادەیی بووم ل مالا خۆشکا خۆ حەمدیایێ ل دهوکێ، دەمژمێر حەفتی شەڤا»١٩٧٩/٣/١»ێ، ئەم لسەر شیڤێ بووین، مە ڕادیۆیا دەنگێ ئەمریکا عەرەبی ڤەکر، و گوهداریا دەنگوباسا دکر، یەکەم دەنگوباس گۆت: ئەڤرو ل واشنطون هاتە راگەهاندن، کو ڕێبەرێ کوردان»مەلا مصطفی بارزانی» ل نەخۆشخانا جورج تاون ل واشنطون ل ژییێ»٧٦» سالیێ دا، و پشتی تووشی نەخۆشیەکا کوژەک بوویی، ماڵئاڤاهی کر، هەڕ ئێکسەر کەفچکێ خوارنێ ژ دەستێ من کەفت و ئێدی زاد د گەوریا من دا نەچوو خارێ و ب خەم کەفتین، و وێ شەڤێ هەمیێ ژ قەهرادا نە نڤستم.
پشتی چەند رۆژەکا شەڤەکێ دەمژمێر هەشت، ڕادیویا مونتیکارلو ئاخفتنەک بناڤێ»مسعود بارزانی» بەلاڤکر، ب ڤی رەنگی: ئەڤرو ل نیقۆسیا بەڕێز»مسعود بارزانی» ڕاگەهاند، کو دێ بەردەوام بن ل سەر خەباتێ تا مافێن مللەتی ب دەستڤە دئینن.
سەڕەڕایی ماڵئاڤاهییا بابێ روحی یێ کوردان مەلا مستەفایێ بارزانی، ئەڤێ ئاخفتنێ باندۆڕا خۆ هەبوو ل سەر ڤەگەڕاندن و بلندکرنا ورەیا گەنجان.
ل ساڵا١٩٨٠ێ ئەز ل پەیمانگەها تەکنولوجی ل بەغدا هاتمە وەرگرتن، ل وێرێ چار هزار قوتابی هەبوون، نێزیکی چارسەد قوتابیان کورد بوون، ل وێرێ من کومەکا نوی یا هەڤالا ژ هەمی پێکهاتێن عیراقی و کوردستانی نیاسین.
حزبا بەعس و دەزگەهێن وێ یێن سەرکوتکەر، وەکی گورگێن هار کەفتبوونە لەشێ خەلکی، و شەرێ هزری و دەرونی و ئابوری دگەل دا دکر، گەلەک نوکەر و خو فروش چێکربوون، بنگەهێن مرۆڤاینیێ و باوەریێ لەق کربوون، و هەر رۆژ گڤاشتنێن بەعسیکرنێ و ئەمنیکرنێ ل بن ناڤێن جودا جودا هەبوون، ئێکەتیا نشتیمانییا خوێندکارێن عیراقێ، کو دەزگەهەکێ سیخۆڕییێ بەعسیان بوو، خوێندکار نەچار دکرن، کو ببنە ئەندامێن وان، ئەگەر خۆ ل خانە و پەیمانگەهێن ماموستایان ژی ناهێنە وەرگرتن.
قوتابیێن کورد پەروەر خۆ دا ئێک و دەربرین ژ بێزاریا خۆ دکرن.
ئەز ژ قوتابییێن زیرەک بووم، من تێکەلیا رۆشەنبیر و نڤێسەرا دکر، هەر لایەکی خۆ وەکو پێتڤیەکا مێژوویی بۆ قوناغا پشتی کارەساتا شۆرەشا ئەیلولێ دادنا و خۆ رەواتر نیشا ددا، هەمیان ژی تیوڕا مارکسیزم-لینینزم پەسەند کربوو، هەتا پارتی ژی لسەر دەمێ سەرکردایەتیا کاتی و کونفرانسێ نەهێ یێ بەرلینێ، بەندەکا تایبەت ب وێ تیوڕێ ڤە جێگیرکربوو، ئەو ژی بەندێ پێنجێ یێ پڕوگرامێ وێ بوو، ئەوێ تێدا هاتی»پارتی د خەباتا خۆ یا سیاسی و ئابوری و جڤاکی دا، دێ ل دویف تیۆرا مارکیسزم-لینینزم بڕێڤە چیت..هتد»ڤی تێگەهی رەنگڤەدانا خو ل سەر هەمی پروگرامێ پارتی و ڕێبازا وێ یا رزگاریخواز و چاپەمەنییێن پارتی هەبوو.
یا ژ مەڤە دێ ب ڤی تیوڕی، پارتی جوانتر لێهێت و باشتر شێت خزمەتا گەل و وەلاتێ خو کەت، و جەماوەرێ مللەتی پتر بو لایێ خو ڕاکێشیت، و وەسا هاتە نیشاندان ڤێ تیوری، باوەریا ب مافێ چارەنڤیسێ گەلان هەیە، و چارەسەریا هەمی کێشێن سیاسی و ئابوری و جڤاکییێن مرۆڤان دکەت، و ئێکەتییا سوفیەت و کومبەستا سۆسیالزمێ پشتەڤانییا بزاڤێن رزگاریخوازێن گەلێن بندەست دکەت و دوستا گەلانە!، و ئەمریکا و بلۆکێ سەرمایەداری بەرێ وان تنێ ل بەرژەوەندیێن وانە، ئەمریکا سەرکێشا ئمپریالزمێ یە، ئەوێ شوڕەشا ئەیلولا نشتیمانی کرە قوربانی بەرژەوەندییێن خۆ، بۆ ڕازیکرنا رژیما دکتاتورییا عیراقێ و ڕژێما شاهێ ئیرانێ! ، ڤێ چەندێ وەکربوو، پترییا کوردان کەرب ژ ئەمریکا و دوستێن وێ ل جیهانێ ڤەببن، بێی کو ئەم د تێگەهێ ململانا بەرژەوەندییان شەڕێ سار و ئاسایشا نەتەوەیی یا دەولەتێن مەزن بزانین.
ژبەر کو ئەز د بنەکوک دا حەژێکەرێ بارزانی و رێبازا پارتی بووم، من ئەو باوەری هەبوو ئەم یێ ل قووناغا رزگارییا نەتەوەیی دا و کێشا مە کێشەکا نەتەوەیی یە، و پارتی ژی بۆ بجهئینانا وێ ئارمانجێ باشترین ڕێکە، هەروەسا من پەیوەندی ژی ب پارتی ڤە هەبوو، ئەڤجا وەکو دەرفەت ژی بو من هەلکەفتی، ئێکسەر گەهشتینە ڕێزێن پێشمەرگەیێ شۆڕەشا «٢٦»ی گولانا نشتیمانییا پێشکەفتنخواز و بووینە پێشمەرگە و کادرێ پارتی.
ل وی سەردەمی پشتی نسکویا شۆڕەشا ئەیلولێ، کوردستان یا داگیرکری بوو.
ل ساڵا «١٩٧٩»ێ شۆڕەشا ئیسلامیا ئیرانێ سەرکەفت و کەفتە د ململانێ دا ل گەل ڕژێما حزبا بەعس و پشتەڤانیا خۆ بۆ هێزێن بەرهنگارییا عیراقێ نیشا دا.
ل ساڵا١٩٨٠»ێ ڕژێما دکتاتورییا صەدامی، شەڕ ل سەر کۆمارا ئیسلامییا ئیرانێ راگەهاند و نەچار بوو لەشکەرێ خو ژ گەلەک دەڤەران ڤەکێشیت و بو بەروکێن شەڕی ببەت.
ئێدی چالاکییێن پێشمەرگەیی و یێن رێکخستنێن سیاسی و یێن میدیایی ب تایبەتی ئێزگێ دەنگێ کوردستان و ئێزگەیێن دی، گەشەکر و باندۆرەکا مەزن ل خەلکی کر.
ئەز بخو وەکو کورێ باژێرا و ژیارا گوندا نەدیتی، ژبەر چالاکییێن خو یێن دژی ڕژێما دکتاتوری ل بهارا سالا»١٩٨٢» کەفتمە بەر لێمشتا ڕاهێلانا زڕتەکێن رژێما دکتاتورییا هەلوەشیایی، نەچار بووم پەیمانگەها تەکنۆلۆجی ل بەغدا بجهـ بهێلم و قەستا ناڤ رێزێن پێشمەرگەیێ شۆڕەشا گولانێ بکەم.
دەمێ من بڕیاردایی ببمە پێشمەرگە، ناڤەراستا هەیڤا گولانا»١٩٨٢»ێ بوو، ئەز ژ باژێرێ ئامێدییێ دگەل هەڤالەکێ دلسوز ب ناڤێ»عەلی حەجی صالح سەرگەلی» دەرکەفتم و ئێکەم قووناغ ئەز گەهشتیمێ گوندێ سەرگەلێ بوو.
ل وی گوندی هندەک خێزانێن دوستێن مە لێ بوون، پێشوازیەکا گەرم ل مە کر، گۆتە من پێ تە یێ خێرێبیت، بەلێ چەوا تو مرۆڤەکێ شەڕمین و نەخۆشی نەدیتی، دێ شێی بییە پێشمەرگە و تەحەملا سڕ و سەرما و برسێ و ترسێ و نەخۆشییا کەیی! من ژی بەرسف دا و گۆت: من بڕیارا خۆ یا دایی و لێڤەنابم ئەگەر ئەز و یێن وەکو من ژی پشکدارییێ د شۆڕەشێ دا نەکەین، پا چەوا دێ سەرکەڤین.
چەند رۆژا ل گوندێ سەرگەلێ مام، پاش هێژا «محەمەد شینۆ» د گەل من هات، و ئەز گەهاندمە گوندێ بناڤیێ و تەسلیمی پێشمەرگەیی کرم و شەڤێ ل وێرێ مام.
رۆژا پاشتر ئەز دگەل پێشمەرگەیەکێ ڕێکخراوا شەهید «عەبدولرەحمان حەمدی» چووم و ئەز گەهاندمە بارەگایێ پێشمەرگەیی ل گوندێ»کارە» ل ناڤ بەرواری باڵا.
ڕێ ژ گوندێ بناڤێ بو بارەگایی ل»کارە»، سێ دەمژمێر بوون، هەمی چیا و دوڵ و ژێهەلی و ژوردانی بوون، ئەو جارا ئێکێ بوو، ئەز هند ب پییا برێڤە بچم، لەورا ئەز گەلەک وەستیام و بێهنا من گەهشتە سەرێ دفنا من.
یا ژ من ڤە بارەگایێن پێشمەرگەیی هەمی ئاڤاهییێن رێک و پێکن و خوارن و ڤەخوارن لێ د مشەنە.
ئەم گەهشتینە رویبارێ زێی، من گۆتە هەڤالێ خۆ دێ چەوا ژ ئاڤێ دەرباز بین!؟ گۆتی ب ساناهیە دێ ب کەلەکێ ئان ب داڤەڕستێ دەرباز بین، من گۆتێ کەلەک چیە؟ و داڤەرست چیە؟ گۆتی لسەر ئاڤێ دێ نیشا تە دەم.
دەما ئەم گەهشتینە سەر رویباری ژ لایێ»بالوکا»ڤە، دبینم رویبار یێ خورتە ئاڤا بوشە و هرمە هرما وێیە و هشێنا ژێ دچیت و سەهمێ سەرێ من گرت.
ئەم چوینە سەر لێڤا رویباری بەرێخو دەمێ چەپەرکەکێ دارا یێ لسەر سێ چوپێن ترومبێلا و ب وەریسی د پێکڤە گرێداینە، هەڤالێ من گۆت، ئەڤە کەلەکە دێ د سەر سیاربین و ب وەریسی ل لایێ دی، دی مە کێشن، وەریس ژی ل هەردوو لایا یێ ب قورمێت داراڤە گرێدایە دا ئاڤ نەبەت.
ب هەر حال ئەم دەربازی لایێ دی بووین، و ئەم بەرەڤ گوندێ»کارە»یێ وێرانکری ڤە چووین، کو بارەگایێ پێشمەرگەیی لێیە، لێ مە بتنێ کاڤلێن گوندی دیتن، ژبەر کو ئەڤ گوندە ژی کەفت بوو بەر لێمشتا ڤەگوهاستن و وێرانکرنا رژێما دکتاتوری..
ل وێرێ ل سەر کانیێ و ل بن توییێ، مە چەند پێشمەرگەیێن نیاسێن خو دیتن، کو پێشمەرگەیێن بارەگایی بوون، و ب گەرمی پێشوازیا مە کرن، من ژی گۆتێ کانێ بارەگا؟ گۆتە من ئەڤەیە، هندی لێ دنێرم چ نابینم! من گۆتێ کا ئەز چ نابینم؟ ئەز هەر یێ ل هیڤییێ بارەگا خانییێن مەزنن! گۆتە من دناڤ ڤان کاڤلان دا مە هندەک کولکێن چێکرین و ئەم بهێندانێ ل ناڤدا دمینین، و ل بەر ڤان کەڤران هندەک نەعوسکێن هەین وەکو جهێن ڤەحەواندنێ بکاردئینین.
وەکێ دی ئەم ل ناڤ مللەتی د گەرییێین و ل گوندا دگەرین و خەلک مە بخودان دکەن.
ب نیڤروڤە، من دیت پێشمەرگەیەک هات و نانەکا سێلێ»دورک»دا من گۆتە من بخو، من ژی هزرکر ئەڤە ژبەر هندێ یە کو ئەز یێ ب ڕێ هاتیم و ئەزێ برسیمە و ئەڤە بەراهییە حەتا خوارن دروست دبیت، من ژی گۆتێ سوپاس دێ خو گرم حەتا خوارن دروست دبیت، ب من کرە کەنی و گۆتە من تو نوی یێ هاتی؟ ئەڤە پێشمەرگاتی یە و هندەک جاران ئەڤ نانا هشک ژی بدەست مە ناکەڤیت!، من ژی نانا خو هەلگرت و چوومە سەرکانیێ نانێ خو ب ئاڤێ خوار.
پشتی دنیا تاری بووی، گۆتە من هەڕە ل گەل هەڤالێن نیاسێن خو بونڤستنێ! من ژی قەستا وان کر گەلەک ب گەرمی ب خێرهاتنا من کر، و جهێ من دناڤ خودا کر، دبینم ژورەکا تاریە و هەر ئێکی دوو بەتەنیێن لەشکەری یێن هەین کو ئەو بخو پێ ناهێنە نخافتن و تهێن تێ نینە پێ گەرم ببن! گۆتە من تو بخێر هاتی ئەڤ کونجە جهێ مەیە تو ژی وەکی مە. دێ د ئێک جهـ دا نڤین، تەنگە و رەقە و سارە و برسە و ترسە، ئەڤە پێشمەرگایەتییە دڤێت بهێن فرەهـ بی و خو لبەر بگری.
هەر دەمێ بیت چێدبیت هێزێن دوژمنی بهێنە مە، چێنابیت جلکێن خۆ بێخی و شیتکا خو ڤەکەیی، و دڤێت ناڤێ شەڤێ ژی ژبەر بکەیی و ژبیرنەکەیی، و ب شەڤ دەرنەکەڤی ژبەر زێرەڤانی دا رەشە چێنەبیت.
سپێدێ زێرەڤان لسەر ژوورا گەڕیا و گازیکرە پێشمەرگەیان، رابن درەنگە!(وەکو هشیاری و ژ بۆ خو پاراستنێ؛ دڤێت هەمی پێشمەرگە زوی ڕابن و خۆ بەڵاڤ کەن، نەکو دوژمن ب سەرڤە بهێن! کو سروشتێ دوژمنی بوو، ب شەڤێ هێزێن خۆ یێن چەکداری دبرنە دەوروبەرێ گوندان ودوورپێچ دکرن، و سحارێ د چوونە د گونداندا، یان ل گەل پێشمەرگە و بەرگری مللییان تووشی شەڕی د بوون،دەمێ سحارێ ژ گوندی دەردکەفتن).
سپێدێ هەڤالێن رێکخراوا شەهید «عبدالرحمان حەمدی» کو پێشمەرگەین وی بارەگایی بوون، جارەکا دی بۆ خوارنا سپێدێ هەر پێشمەرگەیەکی نانەک و گلاسەکێ چایێ دایێ و پوستێ من چێکرو ل گەل چەند پێشمەرگەیان، ئێک ژ وان شەهید «ئیسماعیل دوتازایی» بوو، فرێکرمە لژنا ناوچا ئامێدییێ کو بارەگایێ وی ل گەلیێ بازێ بوو.
هەتا ئەم گەهشتینە گوندێ»هێسێ» ب دەهان گوندێن وێرانکری مە دیتن، ب ڤی رەنگی بو ئێڤارێ، مە خۆ گەهاندە پەرێ گوندێ هێسێ و ئەم لێک کومبوین، رێبەرێ مە گۆتی:دەمێ بو تاری دێ چینە ناڤ گوندی و دێ موختار مە لسەر مالا بەڵاڤەکەت، دێ شیڤا خۆ خۆن و دێ بێژنە خودانێ مالێ زادی بو هەوە بو سباهی دانێ سپێدێ و نیڤرۆ داگریت! و دێ نڤینا بو خۆ ئیننە وی جهێ کو پاشی دێ بۆ هەوە دیار کەم.
هەلبەت ئەڤە بۆ من جهێ شەڕمندەیێ و سەرسورمانێ بوو! دێ چەوا چمە مالەکێ ئەز نەنیاسم! دێ چەوا بێژمێ ئەزێ برسیمە و بو من خوارنێ، و بۆ سباهی سپێدێ و نیڤرو ژی خوارنێ داگرن! دێ چەوا بێژمێ دەستەکێ نڤینا بو من، ما من چ حەق سەر وان هەیە.
ب هەر حال ئەز دگەل پێشمەرگەیەکێ ب سەر هاتی چوومە مالەکێ، کەیفخۆشی ب مەکر، و خوارن دامە و وی پێشمەرگەیی داخازیێن مە ژێ کرن، وان ژی گۆتی وەی سەرچاڤا ما هەکە بۆ هەوە نەکەین پا بو کێ بکەین، هوین یێ گیانێ خو دکەنە گوری بلا ئەڤە ژی ژ مەبیت! ب ڤێ ئاخفتنێ شەرما من پیچەک ڤەڕەڤی.
پاش ئەم چوینە جهێ نڤستنێ، و سپێدێ ئەم ژ گوندی دەرکەفتین.
ب ڕێڤە بو خوارنا سپێدێ ئەم گەهشتینە شێلازا خراب، مە نانێ خو خوار، بو نیڤرو ئەم گەهشتینە بارەگایێ لژنێ، نەمر»سید صالح»بەرپرسێ لژنێ بوو، بارەگایێ لژنێ وەکو بارەگایێ رێکخراوێ بوو، ب تنێ چەند کەپر و دوو چادر بوون، بەلێ پێشمەرگەیێن وی بارەگایی د زۆر بوون، و بارەگایێ وان یێ ب هاتن و چون بوو.
هەر ئەو ژی هەرۆژ ئێڤاری ل گوندان بەلاڤ د بوون، و خوارن بو خۆ بو ڕوژا پاشتر دئینان!
ل بارەگایێ لژنێ، مە چەند هەڤالەکێن دیتر دیتن و پێشوازیا مە کرن، و ئەم هێلاینە ل گەل ڕێکخراوا شەهید خدر مەحمودی، ل ئیڤارەکا درەنگ بەرپرسێ رێکخراوێ، هەڤال سەید نوری هەمی پێشمەرگە و نویهاتی ل نهالەکێ کومکرن و بو ئاخفت و گۆت: ل تاری گەورکێ دێ بو گوندێ»چەم سەیدا»بڕێکەڤین، جۆت جۆت دێ ژ گەلی خوار کەڤین تا دنیا تاری دبیت، پاش ل نێزیک گوندی دێ خۆ دەینە ئێک و ڕێڤەچونێ کەینە ئێک رێز کو دویراتی ل ناڤبەرا هەوە هند بیت لێک ڤەنەقەتیێن و لێک بەرزەنەبن! هەر ئێک یێ بەری خو ببینیت و ئاگەهـ ژ یێ پشت خو هەبیت، وەکو مە ناڤێ شەڤێ دا، دێ ئێک بو یێ دیتر بێژیت تا دگەهیتە هەمیا، بڤی ڕەنگی ئەم گەهشتینە گوندی، هەر زوی دوو پێشمەرگەیێن شەهرەزا فرێکرنە دویف موختارێ گوندی ڕا، دا پێشمەرگەیی لسەر مالا بەلاڤ کەت.
بەرپرسێ رێکخراوێ گۆت:هەر نوی هاتییەک دێ ل گەل پێشمەرگەیەکی بیت، دا بزانیت دێ چەوا چیتە مالا و هێتە مزگەفتێ، ب وی رەنگی مە قەستا مالەکێ کر و کەیفخۆشی ل گەل مە کر و شیف دامە و زادێ مە بو ڕوژا پاشتر داگرت، نڤینێن مە حازرکرن، ئێدی ئەم ب نڤینڤە بەر ب جهێ نڤستنێ، کو مزگەفتا گوندی بوو، چووین. ل وێرێ زێرەڤان دانان و دەوری دەرێخستن.
سپێدێ ئەم هشیار کرین و کەفتینە دویڤ ئێک و بەر ب گەلیێ بازێ چوینە ڤە.
دانێ ئێڤاری رێکخراوێ ئەم کومکرین، کو ئەم یێن بوینە کومەکا نویهاتییا، کاربدەستەکێ لژنێ هاتە لایێ مە و گۆتی، مە پوستێ وە یێ حازرکری دێ چەند پێشمەرگەیان دەینە ل گەل وە، دا وە ل جادێ دەرباز کەن، و بگەهیننە بارەگایێ لقێ١ ل کوماتەیی.
پێشمەرگەیێن داینە دگەل نویهاتیا، دەهـ پێشمەرگە بوون، و ئەم نویهاتی نێزیکی بیست کەسان بووین، هەمی پێکڤە ل بن دارەکێ کومکرن و شیرەت و ئاموژگاری دانێ، رێبەرەک بۆ دەستنیشانکر، ئێدی ئەو ڕێبەرێ کاروانێ مە، بو مە ئاخفت و گۆت؛ڕێکا مە یا دویرە و یا ب زەحمەتە و بترسە!، دێ ژ نوکە ب ڕێکەڤین و بۆ سباهی ئێڤاری دێ گەهینە لقێ هەکە ب سلامەت بین، رێک ژی هەمی چەل و چیا و دوڵ نهال و گەلی نە، ب تنێ جهەکێ مەترسیدارێ هەیی، ژبەر کو د ناڤ سەنگەرێن دوژمنی ڕا دەرباز دبیت، ژبەر هندێ دڤیت د هشیار و بهێن فزەهـ بن.
هوسا ئەم ژ گوندێ خشخاشا دەرکەفتین بەر ب جادا گشتی زاخو-کانی ماسێ، ل نێزیک فەوجا سوتکی، ل وێرێ بەرپرسێ مە گۆتی؛ روینن، ئەم روینشتین، پێشمەرگەیێن بەراهیێ خۆ نێزیکی جادێ کر، کو جادا قێری بوو، پاشی فیتیەک دا، دویڤدا بەرەک هاڤێتە جادێ بو رەقرەقا بەری، ئەڤجا کۆخی، پاشی چەقماق چەڕخاند و چریسک لێ چوون! ئەم یێ ترسین و بۆ خۆ دبێژین ئەڤە چ دکەن! مە هایی ژێ بوو گۆتن ڕابن، وەرن چ نینە، ئەم رابووین و د ناڤ ڕەبییە و سەنگەرێن دوژمنی ڕا ل جادێ دەرباز بووین و بێی کو دوژمن ب مە بحەسیێت، مە خو گەهاندە گوندێ تشیشێ یێ برایێن مەسیحی، ئێدی ل بەرۆژێ تشیش سەرکەفتین بۆ سەرێ تەحتا پشتا گوندی و پاشی ژووردا چووینە خوارێ بو گوندێ قومریێ یێ وێرانکری، مە بێهنا خۆ ل سەر کانیا گوندی ڤەدا، بەرپرسێ مە گۆتی؛ دێ ڕابن رێکا دویرە ئەڤ گوندە نێزیکی دوژمنی یە و ل رۆژێ دکەڤیتە بەرامبەر سەنگەرێن دوژمنی ئەگەر ئەم دیاربووین نە دویرە فروکە بهێنە مە.
ئێدی ب وەسیان و باوەشکێن خەوێ ڤە ل وێ تاریستانێ، مە ڕێ شەقاند، دوڵ و نهاڵ و گەلی و چیا مە دەربازکرن، وەستیانێ پێن مە ژ عەردی نە ڕادکرن.
ب ڤی دەستوداری ئەم د ناڤ ئاقارێ چەندین گوندێن وێرانکری ڕا دەربازبوین، و مە شەڤ ل خۆ کرە سپێدە و ئەم گەهشتینە دەرارێ و بێلمبیرێ، بەرپرسێ مە گۆت؛ دێ بلەز نانەکێ بخون دابچین، ڤێرە جهەکێ مەترسیدارە و یێ ڕویتە، نە دویرە فڕۆکە بهێن، هەر ئێکی پاریەکێ نانی خوار و بۆ سەر خابیری کەفتینە ڕێ، بو نیڤرۆ گەهشتینە سەر خابیری و ل جهەکێ ل بن دارچنارێ؛ بەرپرسێ مە گۆتی؛ ژ نویکا هوین دشێن بێهنا خۆ بدەن، ڤێرە جهەکێ ئەمینە و دوژمن لێنینە، لێ دڤێت لەزێ بکەین، ئەگەر ب شەڤ ڤان چەل و چەلختا یا ب زەحمەتە بگەهینە بنەجهێ و مە نان ژی بۆ شیڤێ نەمایە، دێ برسی بین و نهانی و جهێن نڤستنێ ژی نینن.
پشتی بهێنڤەدانەکا خۆش، ئەم رابووین و بەر خابیر و بەرخابیر چووین بو لایێ کوماتەیی.
بو ئێڤارەکا درەنگ ئەم ب سەر چیایەکی کەفتین و بەرپرسێ پێشمەرگەی دەستێ خۆ درێژکرە نهاڵەکا کویر ل بنارا چیایەکێ بلند ل سەر لێڤا رویباری؛ گۆتی؛ ئەوێ هە کوماتەیە و بارەگایێ لقێ ل وێرێ یە.
پشتی مە خو نێزیک کری، هندەک خانیکێن بچویک یێن ئاخێ ل بەر وان ڕزدا بوون و تژی پێشمەرگە ل وان رەخ و دورا بوون، بەرپرسێ مە گۆت: ئەڤە بارەگایێ لقێ یە!، مە پێ سەیر بوو، بارەگایێ لقا ئێک، ئەو ناڤێ هندێ مەزن ئەو خانیکێ ئاخێ ییێن بجویک ل بەر کەڤرا بن، ل نێزیک بارەگای، زاڵگەها لقێ١ یا دانایی بوو، پشتی زاڵگەهێ ئەم ڕاگرتین و پرسیارا مە کری، کا ئەم ژ کیڤە دهێین، ناڤێن مە تومارکرن، و ئەم برینە لایێ رێکخراوا شەهید زوڕاب، رێکخراوا ئیدارا بارەگایێ لق١، بەرپرسێ وێ هەڤال تاهر هرۆری بوو، بەرپرسێ رێکخراوێ هاتە پێش مەڤە و ب خێرهاتنا مە کر و پوستێ مە وەرگرت بو لایێ لقێ بر، بەرپرسێ لقێ یێ وی دەمی هەڤال دکتور جەرگیس بوو.
بو دەمێ نڤستنێ، ئەم نویهاتی برینە ژوورەکا تەنگ و هەر ئێک ژ مە بەتەنیەکا عەسکەری بێی دوشەک دایێ، هەڤال نەچار بوون پێلاڤین خو یێن ب بهێن دانانە بن سەرێ خو، و خو درێژکەن.
دەم هێش تاری بوو، پێشمەرگەیەک هات و ئەم ژ خەو راکرین، تەنشتێن مە رەق ببوون، و پێن مە نە د چەمیان، هێش دنیا باش روهن نە بویی، ئەم چوینە سەر ئاڤێ و ڤەگەرییاین، گۆتە مە دێ نوکە تێشتێ دابەش کەن، هەر ئێک ژ مە نانەکێ ب ترسی دگەل چایەکێ دا مە، و گۆتی؛ دێ بخۆن دا بچینە چیایی دارا بو تەنیرێ و لێنانگەهێ، پشتی مە نان خواری گۆتن دێ رابن دا بچین، برێڤە مە دیت هەمی پێشمەرگە و بەرپرسێن لقێ یێ بەرەف چیایی د چن! بەرپرسێ نویاتیا گۆت؛ ئەوێن هە بەرپرسێن لقێ نە و ئەو ژی د چنە دارا. لڤێرە دڤێت هەمی شول کەن! زێرەڤانیێ بگرن، نانی بپێژن، زادی بلێنن، داران بینن و هەر کارەکێ دی یێ بهێتە پێش، دڤێت هەمی بکەن.
ب ڤی رەنگی پشتی دو رۆژا ئەم ل بارەگایێ لقێ١، فەرمانا ڤەگوهاستنا من بۆ لژنا ئامێدیێ دەرکەفت، پۆستێ مە چێکر بۆ لژنێ، ئێنا من گۆتە بەرپرسێ پوستە دایەف مە، ما هوین چەکی نادەنە مە!؟، بەرپرسی کرە کەنی و گۆت: چەک کا! هوین دێ بنە پێشمەرگە و ئەوێن چەک هەی دێ شەڕی دوژمنی کەن و سەنگەرێن وان ستینن و چەکێ وان هەلگرن و دەنە وان پێشمەرگێن بێ چەک، شۆڕەشا مە یا گولانێ پشتبەستنە ب گەلێ کوردستانێ و هێزا مللەتی و بیروباوەرێن پێشمەرگەی و ب شەڕێن پارتیزانی چەکێ ژ دوژمنی دستینین و شەڕی پێ دکەین!، هندەک جاران ژی چەک بۆ مە ژ وەلاتێن دۆست ڤە دابین دبیت،بەلێ رێکا گەهاندنێ یا ب زەحمەتە، پشتی شکەستنا شۆڕەشا ئەیلولا مەزن پارتی بڕیار دا، نابیت ئەم پشتا خۆ ب دەولەتێن داگیرکەرێن کوردستانێ ڤە گەرم بکەین و هاریکاریا ژێ وەرگرین، دا نەبینە دیلێن وان و بۆ بەرژەوەندییێن خۆ، مە ب خاپینن و بکەنە گۆری و قوربان.
د ڤان هزران دا، ئەز ل گەل مەفرەزەکا پێشمەرگەی و چەند نویهاتیا ڤەگەڕیاینە ڤە بۆ لژنا ناوچا ئامێدیێ هەر ب وێ رێکێ، هەر ب وی رەنگێ رێنمایان.
پشتی ئەم گەهشتین، و پوستێ مە گەهاندی، دەستەیا لژنێ کومبوون و بڕیار دا، نویهاتییان ل سەر رێکخراوێن پێشمەرگەیی بەڵاڤ کەن و ناڤێ من بو ڕێکخراوا شەهید صادق عەبدوللا دانا، یا کو بەرپرسێ وێ نەمر ئەحمەد ئورەیی بوو، هەر وێ ئێڤارێ پێشمەرگەیەکی ناڤێ من گازی کر و گۆتی؛ وەرە ئەڤە کاربدەستەکێ رێکخراوا وەیە دا دگەل بچی یە رێکخراوێ و دەست ب کارێ خۆ بکەیی، کەیفا من گەلەک هات و من نیاسینی دگەل وی کاربدەستی کر، و من گۆتێ بارەگایێ رێکخراوا هەوە ل کیرێ یە؟! گۆت مە چ بارەگا نینن!، ئەم رێکخرەکا گەڕوکین!، من گۆتێ پا بو خوارنێ هوین چ دکەن؟، گۆتی هەر شەڤ دچینە گوندەکی، و ئەم یێ ب هیڤیا گوندییان ڤە!، براستی بۆ من چ ژ وێ نەخۆشتر نەبوو، کو بچینە گوندان و ل مالان بەڵاڤ بین و هەر سێ دانێن خوارنێ ژ وان بن!. سەرەرایی مەردینی و دلڤەکرییا گوندییان، بەلێ نە بوو رۆژەک و دوو.
مە دا ڕێ و ئەم گەهشتینە ڕێکخراوا خو، و مە هەف نیاسینی دگەل ئێک کر. رۆژانە دگەل تاری گەورکێ دا بێژینە مالەکێ خالەت چەوانی، و دا نڤینا بخۆ بەین و چینە مزگەفتێ، براستی خەلکێ مە هەمی گەلەک د مێهڤان دوست بوون.
یا هەژی گۆتنێ یە، گوندیا ب هەژاریا خۆ ڤە، گەلەک هاریکاریا پێشمەرگەیی دکر، ژلایێ کەیفخۆشی و هاندانێ ڤە، رێکخستن و پەیوەندیکرنێ ڤە، خوارن و ڤەخوارنێ ڤە، چارە و دەرمانان ڤە، بهێنڤەدانێ و شویشتنێ، و پاقژیێ ڤە، گەهاندنا دەنگوباس و پێزانینان ڤە، هەر پێتڤییەکا دیتر و گەلەک جاران ژی وان بۆ خۆ د مالێن خۆ دا چ نەبوویە، و خۆ پێ نەئینایەدەر، دا پێشمەرگە شەرم نەکەن و بێزار نەبن.
گوندیێن هەژار، گەلەک دەردەسەری ددیتن، بەرهەمێ وان یێن چاندنێ دکەفتە بەر لێمشتێن دەستدرێژییێن دوژمنی ژ توپبارانکرن و سوتن و قەدەغەکرنێ، کو ببنە باژێرا بفروشن، ژ بلی کو ئابلوقا ئابوری ل سەر گوندا بوو، نە د هێلا گوندی بۆ خۆ ئەرزاقی ژ باژێرا ببنە گوندان تا وی ڕاددەیی نە د هێلا هەر وەلاتییێن گوندان بۆ خۆ ژی هاتن و چوونا باژێرا بکەن، چ فەرمانگەهـ و قوتابخانە نە هێلا بوون، زالگەهێن دوژمنی، وەکو گورگێن هار سەرەدەری ل گەل گوندییا دکرن، ئەگەر زانیبا ئێکی ئەرزاق یان دەرمان ڤێنە، دا گرن و سزایێن گران داننە سەر، لەوا خەلکێ گوندان نەچار بوون ب ڕێکێن قەچاخی و ب شەڤ و ب نهێنی قەستا وان جهان بکەن، یێن کو ئەرزاق دەست بکەڤیت.
ئەڤە ژیان و ژیار و معاناتێن گەنجەکی بوون، دەما بوویە پێشمەرگە، و هەر پێشمەرگەیەکی چیروکەکا ب ڤی رەنگی یا هەیی.
پێشمەرگایەتی، ئەو بریارا مرۆڤی ژ ناخێ خۆ ددا، و ب هەمی باوەری ڤە بەرەڤانی ژ ئاخ و ئاڤ و کەرامەتا گەل و مللەتێ خۆ دکر، ژبەر کو یا گرنگ نەبوو، دێ ب چ چەک شەری کەن و بەرەڤانیێ کەن، بەلکو مەزنترین چەک بیروباوەرێن کوردایەتیێ بوون، هەر ئەڤ بیروباوەرەژی بوون، چوک ب دوژمنی دانایی و بو هەمی دونیایێ سەلماندی، کو ئەم خەلکێ کوردستانێی نە، ئەم گەلێ کوردستانێی نە، ئەم خۆ ناچەمینین، ئەڤە ئەو رێباز بوو، یا بابێ روحیێ نەتەوا کورد» مەلا مصطفی بارزانی» دانایی، شەهید بوون لسەر ڤێ رێبازێ مەزنترین شانازی بوویە، هەم بو کەسێ شەهید هەم بو خێزانا وی هەم بوو هەمی کوردستانێ.
گەنج و لاوێن ڤی وەلاتی، بوونە پێشمەرگە و ب خوینا خۆ بەڕەڤانی کر، خەلکێ ڤی وەلاتی ب نان و دلسۆزیا خۆ پێشمەرگە ب خودانکر، چیایێن ڤی وەلاتی بوونە نێزیکترین هەڤال و جەستەیێ خو د خوینێ وەرکر، ب شەڤ وەلات ئازاد د بوو، و د تارییاتییا شەڤێ دا هیڤی و ئارمانج ژ دایک د بوون و قارەمانی دهاتنە کرن، و سەرکەفتن د بوونە راستی.
ئیرادەیا خەلکێ کوردستانێ چوک دانەنا و ئامادەنەبوون، ل ژێر زۆرداریا دکتاتور و زالم و زڕتەکان دا بژین، هەمی پێکڤە ئامادەبوون بمرن، بو هندێ د ژیانەکا سەرفەراز دا بژین.
