گۆڤارا مەتین گۆڤارا مەتین
فه‌رسه‌ت ئیبراهیم
وه‌رگێڕان، ژ كارێن فه‌ره د ناڤ ره‌وشه‌نبیرییا هه‌ر ملله‌ته‌كى دا، كو ب رێیا وێ خوانده‌ڤان ب سه‌ر گه‌له‌ك تشتێن نوى هه‌لدبیت و بیاڤێ ره‌وشه‌نبیرییا وى زێده دكه‌تن. دیسان وه‌رگێڕان د هنده‌‌ك بیاڤان دا ژ كارێن فه‌ره، نه‌مازه لایه‌نێ دیرۆكێ و جڤاكى و ئه‌و بابه‌تێن خزمه‌تا مرۆڤاتیێ دكه‌ن.
د كه‌ڤن دا گه‌له‌ك رۆژهه‌لاتناس و كه‌سێن بیانى چ وه‌ك گه‌ڕۆك یان رۆژهه‌لاتناس هاتینه ده‌ڤه‌رێ و دیتن و تێبینی یێن خۆ نڤیسینه، چ ژ بۆ خۆ بیت، یان بۆ لایه‌نه‌كێ دیاركرى نڤیسی بیت، پشتى ئه‌و نڤیسین وه‌كو په‌رتوك هاتینه به‌لاڤ كرن، گه‌له‌ك ژ وان بۆ سه‌ر زمانێ عه‌ره‌بى یان زمانێ كوردى هاتینه وه‌رگێڕان، ئه‌ڤه‌ژى پێنگاڤه‌كا پیرۆزه كو بشێین وان نڤیسینان ب زمانێ خۆ بخوینین.
گه‌له‌ك جاران مرۆڤ پێدڤى دبیته وێنه‌یه‌كى یان دكیۆمێنته‌كێ، تنێ د وێ په‌رتوكێ دا هه‌یه، به‌لێ ده‌مێ ل دانه‌یا وه‌رگێڕایى دزڤڕین؛ دێ بینین ئه‌و وێنه و دكیۆمێنت تێدا نینن و هنده‌كێن دیتر وه‌رگێڕى ژ لایێ خۆ ڤه داناینه، كو دبیت ب دروستى مه‌ره‌ما بابه‌ت پێ هاتییه نڤیسین، نه‌گه‌هینیت.
بۆچى ڤێ چه‌ندێ دبێژم..!! به‌رى چه‌ند رۆژان براده‌ره‌ك پێدڤى ب په‌رتووكه‌كێ بوو، كو وێنه‌یێن بابێ وى تێدانه و باوه‌ر بكه‌ن، كو وى وه‌كو پێدڤى بابێ خۆ نه‌دیتییه، ده‌مێ بابێ وى هاتییه گرتن و ژ ناڤبرن، ئه‌و براده‌ر زاڕۆكه‌كێ بچویك بوویه، باب ژى د زیندانێ دا هاته شه‌هیدكرن، به‌لێ به‌رى هینگێ خودانێ وێ په‌رتووكێ ب كامیره‌یا خۆ وێنه بۆ وى كه‌سایه‌تى گرتینه و د په‌رتوكا خۆ دا به‌لاڤ كربوون، كو گرێدایى ژیانا وى بوون ل گه‌ل بزاڤا رزگاریخوازا كوردى، كو هه‌ر سه‌را هندێ ژى هاته ژ ناڤبرن.
د وه‌رگێڕانێ دا، فه‌ره هه‌ر تشتێ د ناڤ ناڤه‌ڕۆكا په‌رتووكێ دا، وه‌كو خۆ بهێته وه‌رگێڕان و هه‌ر تێبینى و ئاڤڕییه‌كا هه‌بیت، د فه‌رۆزان دا ژ لایێ وه‌رگێڕى ڤه بهێنه نڤیسین. هه‌ر وه‌سا هه‌ر دكیۆمێنت و وێنه‌یه‌كێ تێدا بیت، گه‌له‌كا فه‌ره جاره‌كادى د دانه‌یا وه‌رگێڕایى دا، ئه‌و دكیۆمێنت و وێنه وه‌كى خۆ بهێنه خوارێ، دا كو ببیته ژێده‌ره‌كێ زانستى و باوه‌ر پێكرى..!!
