گۆڤارا مەتین گۆڤارەکا ڕەوشەنبیری یا گشتی-هەیڤانەیە
شەمال ئاکرەیی
شۆڕەشا ٢٦ێ گولانا پێشکەفتنخواز، ٤٧ ساڵان بەری نها، ل ساڵا ١٩٧٦ێ وەک درێژەپێدەرا شۆڕەشا ئیلوونا مەزن دەستپێکر و وەرچەرخانەکا مێژوویی د پێڤاژوویا خەباتا رزگاریخوازا گەلێ کوردستانێ دا بەرپاکر. سەرۆکێ خۆشتڤی مەسعود بارزانی، دەستپێشخەرێ نویکرنەڤا پارتی و دەستپێکرنەڤا خەباتا چەکداری و هەلکرنا خەتیرا شۆڕەشا گولانێ، دۆرهێلێ شکەستنا شۆڕەشی و زیندانکرنا ئۆمێدان رەتکر و هیڤییەکا گەش و پڕ ئاسۆ ل وی دەمێ هەستیار، کو بێئۆمێدیێ پەڕێن خۆ ب سەر کوردستانییان دا دابوون، پەخشی گەلێ کوردستانێ.
پشتی رێککەفتنا خیانەتکاری یا جەزائیرێ، کو د ئەنجام دا شۆڕەشا ئیلوونێ راوەستییا، بەلێ ژبۆ تەمامکرنا وان ئارمانجێن بزاڤا ئازادیخوازا کوردستانێ، یێن هێشتا ب دەستڤەنەهاتین، پێشمەرگەیێن دلێر ب لویلیێن تڤەنگێن خۆ، بەرسڤەکا رۆهن و وێرەک هەمبەر پیلانێن نەیار و دوژمنان داڤە و خەتیرا شۆڕەشا گولانێ ب هەناسە و بێرکرنەڤەیەکا نوی و سەردەمیانە هلکر. ئەڤێ شۆڕەشێ، هێز و هیمەتا خۆ، ژ کویراتییا کانگەها رێبازا پیرۆزا پارتی و بارزانی و ژ خۆڕاگری و بەرخۆدان و و ئیرادەیا مللەتێ کورد وەرگرت و مەیدانا خەباتێ گەرمکرەڤە. خەلکێ ئەمەکدارێ کوردستانێ ژی، چەکێ بەرەڤانی و شەڕەفێ هەلگرتەڤە، و دەست ب خەبات و تێکۆشین و پارتیزانیێ کر و ب مێرخاسی دەهان داستانێن ب رۆمەت تۆمارکرن.
ئەڤ شۆڕەشە، کو د قووناغەکا سەخت و دژوار دا بەرپابوویی، بۆ هەمی جیهانێ و نەمازە بۆ دوژمن و نەیاران زێدەباری ئەو هێز و جەبلخانەیا مەزن یا دوژمنی، ب مەرەما بێدەنگکرنا داخوازیێن رەوا یێن گەلێ کورد کۆمکری و ئەو سوپایێ راگەهاندنێ، کو کارێ وی پەردەپۆشکرنا راستییان و ڤەشارتنا سیاسەتا ب عەرەبکرنێ و گوهۆڕینا روخسار و سیمایێ رەسەنێ دەڤەرێن کوردستانێ و دروستکرنا کۆمەڵگەهێن زۆرەملی و تەڤ کریارێن دی یێن چەپەڵ و کرێت، کو رژێمێ ل هەمبەر کۆڕێن مللەتی بکاردئینان سەلماند، کو کورد ملکەچ نابن و هەر دێ د بەرەیێ بەرەڤانیێ دا مینن هەتا دگەهنە هەمی ئارمانجێن خۆ یێن رەوا.
رژێما بەعسا گۆڕبگۆڕ، ژ کریارێن خۆ یێن نە مرۆڤینی رانەوەستا؛ لەوڕا د هەشت قووناغان دا، کەمپینێن ئەنفالێن رەش بسەر مللەتێ مە دا ئینان، کو دئەنجامدا ١٨٢هزار ژ کۆڕێن گەلێ مە ب ساخی هاتنە بنچالکرن و ٤٥٠٠ گوند ل گەل ئەردی راستکرن، وەک ئێک ژ هۆڤیترین جینۆسایدێن ڤی سەردەمی.
ئەڤێ شۆڕەشێ ساخلەتەکێ دی یێ گرنگ هەیە، کو فرەپارتایەتی وەک رەگەزەکێ سەرەکی یێ دیموکراسیێ هەمبێزکر و بەرەیێ (جۆد) پەیدابوو و ئاشتبوونەڤەیا نیشتمانی، کو کاک ئیدریس بارزانیێ جانەمەرگ و ئەندازیارێ ئاشتیێ ناڤخۆ، رۆلەکێ مەزن تێدا گێڕا د دروستکرنا ئێکرێزییا مالا کورد د چارچویڤێ بەرەیێ کوردستانی دا. دیسان هەر ژ ساخلەتێن گرنگ یێن شۆڕەشا گولانێ، تۆڕا پەیوەندیێن پارتی دیموکراتی کوردستان ل سەر ئاستێن کوردستانی و جیهانی، گەلەک بەرفرەهـ و ب هێز لێهات.
دەستپێکرنا شۆڕەشا گولانا پێشکەفتنخواز، ب گرۆڤ و بەڵگە، دوپاتکرەڤە کو کورد گەلەکێ زیندی و خودان دۆزە، و هەر کاودانەکی دا دکاریت بەردەوامیێ بدەتە شۆڕەشێ. لەوڕا؛ ل گەل هلبوونا چریسکا شۆڕەشێ، ل گەلەک دەڤەرإن وەڵاتی، لڤین و تەڤگەڕا پێشمەرگەیێن پارتی و بارزانی دەسپێکرەڤە و پێشمەرگە شییان گۆرز و دربێن کوژەک و ئێکلاکەر ل کویراتییا دەڤەران بوەشینە سوپایێ داگیرکەرێ بەعسییان و دویڤەلانکێن وان، و هەر شۆڕەشا گولانێ بوو، فاکتەرێ هەری سەرەکی ژ بۆ رێخۆشکرن و بەرهەڤکرنا جەماوەرێ کوردستانێ، داکو ب سەرهەلدانا بوهارا ساڵا ١٩٩١ێ، مل ب ملی پێشمەرگە و رێخستیێن نهێنی یێن پارتی و ئالیێن دی یێن بەرەیێ کوردستانێ راببن.
دەستکەفت و سەروەریێن شۆڕەشا گولانێ گەلەکن و سەرکەفتن و هەلبژارتنێن دیموکراسی بۆ ئاڤاکرنا پەرلەمان و دامەزراندنا حکومەتا هەرێما کوردستانی و ئەڤ پرۆسەیا بەردەوام یا ئاڤەدانیێ و پێشڤەچوونێ ژی، ژ بەرهەمێ وێ شۆڕەشێ یە؛ و ئەڤ ئازادییا ئەم نۆکە تێدا ژ بەرهەمێ رەنج و خۆڕاگرییا خەلکێ کوردستانێ و خوینا شەهیدێن بزاڤا رزگاریخوازا کوردستانی یە.
٤٧مین ساڵڤەگەڕا بەرپابوونا شۆڕەشا گولانا پێشکەفتنخواز، ئەڤرۆ د دەمەکی دایە، کوردستان و عیراق د قووناغەکا هەستیار دا دبۆرن، بەلێ گەلێ کورد باوەڕییەکا موکوم ب حیکمەت و رێبەرایەتییا سەرۆک بارزانی هەیە و شییایە بەرهنگاری تەڤ ئاستەنگان ببیت و پارێزگاریێ ژ دەستکەفتان بکەت.
پێدڤییە ئالیێن سیاسی ل هەرێما کوردستانی، هەمی بزاڤان بکەن و گاڤان بەر ب نزیکبوونا ئالیێن سیاسی یێن کوردی ب هاڤێژن و ب هێچ رەنگەکی ژ هەڤ دابڕینێ قەبوول نەکەن، چونکی کلیلا سەرکەفتنێ د ژ هەڤ نزیکبوونێ دا یە.
