د ڤی سەردەمی کو نووچە تێدا گەلەک ب لەز بەلاڤ دبن و دیتن و بۆچوون تێکهەل دبن، دەنگێن جددی و رژد د ناڤ قەرەبالغا سۆشیال میدیایێ و ناڤەرۆکێن سەرپێ یی دا بەرزە دبن، گۆڤارا مەتین وەکی پەنجەرەیەکا ڤەکری، چونکی مەتین سەکۆیەکە بۆ ڕامان و پرسیاران، مینبەرەکە بۆ هزر و گەنگەشەیان، مەیدانەکە بۆ تام و چێژ وەرگرتنێ ژ رەوشەنبیرییەکا فرە – رەهەندی و ئاست بلند، لەوڕا هەژمار  ل دووڤ هەژمارێ مەتین هەبوونا خۆ دسەلمینیت  و  ب هەر دو شێوازێن خۆ یێن کاخەزی و دیجیتالی، بزاڤێ دکەت رۆلێ خۆ یێ بەرچاڤ د قادا ڕەوشەنبیریێ دا ب هێزتر بکەت و پتر بچیتە د ناڤ تەخا رەوشەنبیران دا و بگەهیتە پترترین رێژەیا خواندەڤانان.

مەرەما مە ل ڤێرە، نە پێشبڕکیکرنا مانشێتێن سەرنجڕاکێشە و نە ژی هەژمارێن دیتنێن دەمکی نە، بەلکو مەرەما مە بەلاڤکرنا بابەتێن سەرپێ یی نینە، بەلکو ئەم دخوازین ل گۆری پەیاما گۆڤارێ و بیاڤێ هەیی، ب کارین ئاستێ رەوشەنبیری و هەست و دەروونی یێ خواندەڤانان زەنگینتر لێ بکەین، داکو ببینە پرە ژ بۆ ب هەڤگەهاندنا مژارێن نڤیسەرێ خۆشتڤی دنڤیسن و (مەتێن)ێ د کەنە ئاویز و ئامرازێ گەهاندنێ. ژ بەر ڤێ چەندێ، پێڤەرێ مە یێ ئێکێ و داویێ ناڤەرۆک و بلندییا ئاستێ مژار و بابەتێن د هەر هەژمارەکی دانە. گۆڤارا مەتین، نا پرسیت کا ناڤێ نڤیسەری و جهێ وی یێ جڤاکی یان پاشخانەیا وی یا ئەکادیمی و ئالیگرییا وی یا سیاسی چییە، بەلکو پرسیارا بهایێ مژارا ئەو دنڤیسیت و ڕاستگۆیی و  کووراتیا هەلدگریت و شیانا وێ د پشداریکرن و زەنگینکرنا هزر  و  جوانییا مرۆڤایەتیێ دا دکەت.

ڕەوشەنبیرییا ڕاست، چو سنوور و بەندان نانیاسیت و ب تنێ د چارچووڤەیێ گرۆپەکێ دائێخستی یان کۆمەکا دیار کری دا نامینیت، بەلکو رەوشەنبیرییا راست، ب دیتنا مە، پرەکێ د ناڤبەرا بەرەبابان دا د روست دکەت و  دانوستاندنێ د ناڤبەرا گەلان دا پەیدا دکەت و هەڤدیتنەکا بەردەوام د ناڤبەرا عەقل و هەستان ئاڤا دکەت.

رەنگە نڤیسەر ڤەکۆلەرەکێ ئەکادیمی بیت و بابەتەکێ دیرۆکی یێ بەلگەکرى بەحس بکەت، یان ئەدیبەک بیت دەقەکێ چڕ بنڤیسیت و گۆتوبێژێ ل گەل بیرهاتن و خەیالێ بکەت، یان هزرڤانەک بیت، دیتنا خۆ دەربارەی بابەتێن سەردەمی پێشکێش بکەت، یان هونەرمەندەک بیت ب پەیڤان سیمایێن جوانیێ وێنە بکەت. یا گرنگ ئەوە کو ئەو بابەتێ دهێتە بەلاڤکرن بشێت کارتێکرنەکێ ل دەڤ خواندەڤانی چێ بکەت و تشتەکی بهێلیت کو ژ خواندنەکا دەمکی دەرباز ببیت.

ئەم د گۆڤارا مەتین دا، دێ گرنگیێ دەینە بەلاڤکرنا گۆتار و ڤەکۆلین و خواندنێن کو ڕەنگڤدانەکا بەرفرەهـ یا گرنگیپێدانان ڤەدگریت: ژ دیرۆکا کو خواندنەکا نوو ژ بۆ رابۆری دکەت، داکو ئەڤرۆ پێ ڕۆهن بکەت. بەلێ ئەم نە ب تنێ ل سەر ڤان ناڤونیشانان رادوەستین، بەلکو دێ دوورتر چین، بەر ب بابەتێن جڤاکی یێن هەڤچەرخ و بابەتێن زانستی یێن سادەکرى و ئەزموونێن کەسۆکی یێن مفابەخش، چونکی ڕەوشەنبیری ژ ژیانا ڕۆژانە یا جودایە، بەلکو د ناخێ وێ دایە.

ئەم باوەر دکەین کو خواندەڤان وەرگرەکێ پاسیڤ نینە، بەلکو د چێکرنا هشیاریێ دا هەڤپشکەکێ سەرەکی یە. هەر تشتێ ل ڤێرە دهێتە بەلاڤکرن، دەرگەهەکێ نوو یێ هزرکرن و گۆتوبێژێ ڤەکەت. ژ ڤێ ڕوانگەهی، ئەم دخوازین لاپەرێن گۆڤارا مە، بۆ لێکگوهارتنا دیتنێن جودا جودا و ڕەخنەیان ببنە مەیدانەکا ڤەکری.

ڕەوشەنبیریێن مەزن هنگێ گەش دبن، دەمێ کو هەڤسەنگییەکا باش د ناڤبەرا وەفادارییا بۆ رابۆری و ڤەبوونێ ل هەمبەر پاشەرۆژێ دا دروست دکەن. ل ڤێرە ئەم بزاڤێ دکەین کو (مەتین) ببینە نەینکا ڤێ هەڤسەنگیێ. ئەم ڤەکۆلینان ل سەر ئەدەبێ کلاسیکی بەلاڤ دکەین، ژبلی کو ئەم خزمەتا کلاسیکان دکەین، بەلکو دا کو ببنە ڕۆناهی و پرسیارێن سەردەمی ژی دروست بکەین.  ئەم گرنگیێ ب هزر و فەلسەفێ ددەین، نە دا کو زاراڤان نیشا بدەین، بەلکو دا تشتان ژێ وەربگرین، دا کو د تێگەهشتنا خودێ و گەردۆنی و هەبوونا ئەڤرۆ دا هاریکاریا مە بکەن.

ژ  بەر  کو هونەر پاقژترین ڕوویێ گیانێ مرۆڤایەتیێیە، ئەم جهەکێ باش د ڤێ گۆڤارێ دا ددەینێ. ل دەربارەی وێ مۆزیکا کو هەستان دهەژینیت، شانۆیا کو پرسیاران دشارینیت، سینەمایا کو چیرۆکان ژ نوو دادرێژیت و هونەرێ شێوەکاری کو زمانەکێ بەرفرەهتر ژ پەیڤان ددەتە ڕەنگان کو نڤیسینە، چونکی هونەر نە ب تنێ شیانەکە، بەلکو پێدڤییەکا مرۆڤی یا رەهەند کوورە، وەک پێدڤییا مە ب زانین و هزرێیە.

ل داویێ، مە دڤێت ببێژین کو گۆڤارا مەتین نە پڕۆژەکێ دەمکییە و نە ژی ئەزموونەکا دەربازبوویە، بەلکو دیتنەکا بەردەوامە. ئەم هەیڤانە تبابەکا ژ هەژی یا مژار و بابەتێن رەوشەنبیرییا گشتی بەڵاڤ دکەین پێخەمت خزمەتکرنا خواندەڤان و نڤیسەر و ڤەکۆلەران؛ چونکی ڕەوشەنبیری نە تشتەکێ ئیکسسوارییە، بەلکو ژیانە، لەوڕا ژی ناڤەرۆک و بلندییا  وێ، ب دیتنا مە جوانترین خزمەتە.