هەتا بەری نۆکە بچویکترین درۆنا سیخوڕیێ ئەو بوو یا نەرویجێ چێکری و د گۆتنێ زرکێتکا رەش (Hornet nano PD-100) کو (2.5) سانتیمەتر بوو و کێشا وێ (18) گرام بوو. لێ نۆکە چین ل سەر تەکنۆلۆژیایەکا گەلەک ژ وێ پێشکەفتیتر، کو ل سەر زیرەکییا دەستکرد یا هاتییە دامەزراندن، یا کار دکەت و دبێژنێ (درۆنێن نانۆیێن موسکیتو) یان (رێکخستیێن هەوایییێن بچویک: Micro UAS).

ئەڤ درۆنە ل سەر شێوەیێ مێشومۆرێن وەکی (پێشی، مێش و مێشا هنگڤینی) هاتینە چێکرن، کو ب تنێ (٦) ملیمەترە و تەرزێ فڕینا وان ژی وەکی یا وێ مێشومۆرێ یە یاکو ل سەر شێوێ وێ هاتییە چێکرن و مەزناهیا وان ژ سانتیمەترەکێ کێمترە و کامیرەیێن هویر و مایگرۆفۆن د پێكهاتێ وان دا هاتینە دانان، و ئەو دشێن ل هەمی جهان، تەنانەت جهێن گرتی ژی بفڕن.

مەترسییا ڤێ تەکنۆلۆژیێ د ڤان خالان دایە:

• رادار نەشێن وان ڤەبینن.
• زەحمەتە مرۆڤ بشێت ب چاڤێ خوە یێ ئاسایی وان ژ مێشومۆران جودا بکەت.
• چ دەنگ یان رۆناهی یانژی ئیشارەت ژێ دەرناکەڤن.
• بێی کو کەسەک هەست پێ بکەت، ئەو دشێن خوە بگەهینن هەر جهەکی.

هەگەر ئەڤ تەکنۆلۆژییە ب هژمارەکا بەرفرەهـ بهێتە بکارئینان، دبنە ئامیرێن چاڤدێرییا ب کۆمەل و ب شێوەیەکێ وەسا تایبەتمەندییێن مرۆڤان بن پێ دکەن، کو بەرێ نەهاتبتە دیتن؛ چونکی:

• ئەو دشێن چاڤدێرییا سەرکردەیێن لەشکری و جهێن هەستیار بکەن.
• ئەو دشێن کۆمبوون و ئاخفتنێن ڤەشارتی تۆمار بکەن.
• هەگەر بکەڤنە بەر دەستێ خەلکێ ئاسایی، ئەو دشێن وان ژ بۆ سیخوڕییا ل سەر مال و کۆمپانییان بکار بینن و دشێن بەڵگەنامە و بەرنامە و هزرێن هەڤڕکێن خوە ژێ بدزن.

ئەڤ پێشکەفتنە خەیالا زانستی نینە، بەلکو ئەو راستییە و ب لەز یا نێزیکی مە هەمیان دبت.

لڤێرە پرسیارا هەری بهێز، کو خوە ل مێشکێ مە ددەت، ئەوە کو: ئەرێ گەلۆ ئەڤ تەکنۆلۆژیایا کو ژ بۆ ساناهیکرنا ژیانا مرۆڤان هاتییە چێکرن، هوین دبێژن وەلێ بێت، کو ئەم نفشێ مرۆڤان ژ بۆ دژایەتییا هەڤدو و خرابکرنا شیرازەیا مرۆڤایەتیێ بکار بینین؟!