سەرباری کارێ وی، کو سەرۆکێ مەزنترین دەولەتا جیھانێ بوو، ل 16ی چریا دویێ 2010ێ باراک ئۆباما، سەرۆکێ ئەمریکا یێ بەرێ، پەرتووکەک بۆ زارۆکان ل ژێر ناڤێ (بۆ ھەوە سترانا دبێژم: نامەک بۆ کچێن من of THEE  I SING, A Letter to My Daughters)، ب زمانەکێ سڤک، خۆش و سانەھی بەلاڤکر. ل دەستپێکا  ھەر نامەیەکێ ب شێوازێ پرسیاری یە. ئوباما د بنەکوکا خۆ دا نە شاعیرە، بەلێ ب سادەیی و نێزیکی سەقایەکێ شاعری ب پەیڤان دەڕبڕینێ دکەت.  ل ڤێرە: ئەم بەرامبەری سەرۆکێ دەولەتەکا مەزنین، بەلێ پەیڤێن خۆ ئاراستەی زارۆکان دکەت.

ئوباما، ھەلگرێ خەلاتێ نوبل یێ ئاشتیێ، نە ئێکەم سەرۆکێ ئەمریکایە بۆ زارۆکان دنڤێسیت، بەری وی جێمی کارتەری ژی پەرتووکەک ب ناڤێ (زارۆکێ ساڤا سنوگل فلیجەر The Little Baby Snoogle-Fleejer) و تیۆدور رۆزەفلتی ژی پەترووکەک ب ناڤێ (سەرھاتییێن پەھلەوانی د مێژوویا ئەمریکا داHero Tales from American History) نڤیسینە.

پێنج سەد ھەزار دانە ژ ڤێ پەرتووکێ ھاتینە چاپکرن و داھاتێ وێ ژی بۆ پەروەردەکرن و فێرکرنا زارۆکێن شەھید و پەککەفتیێن سەربازێن ئەمریکی ھاتییە پێشکەشکرن.

ژ بلی ڤێ پەرتووکێ، ئوبامای سێ پەرتووکێن دی ژی نڤیسینە: (خەون ژ بابێ من Dreams from My Father  – ١٩٩٥)، (وێرەکی یا ئومێدێ  The Audacity of Hope  – ٢٠٠٦) و ( ئەردێ ژڤانێ A Promised Land – ٢٠٢٠) ب چاپێ گەھاندینە.

پەرتووکا (بۆ ھەوە سترانا دبێژم: نامەک بۆ کچێن من) یا بوویە جھێ بالکێشیا زارۆک و گەنجان و دانعەمران ژی، چەندین پەیام وانەیان پێشکەشە خواندەڤانان دکەت، وەکی:

– چەند بەھایێن گرنگ (وێرەکی، رادەست نەبوون، خۆبەخشی.. هتد)، بەرچاڤ دکەت.

– دیار دکەت، کو وەڵات ل سەر دەستێ خۆدان پاشخانەیێن جودا یێن چین و تەخان دھێتە ئاڤاکرن.

– گرنگییا وەکھەڤیێ و دادپەروەریێ د چڤاکێ دا خۆیا دکەت.

– داکۆکیێ ل سەر رێزگرتنێ بۆ ساخلەتێن ھەر تاکەکی دکەت.

– رژدیێ ل سەر پەروەردە و زانینێ دکەت.

– ژییاتی بۆ وەڵاتی.