گرنگییا دەرخستنا یاسایا یا نەفت و غازێ ل جڤاتا نوینەرێن ئیراقێ

بەرهەڤکرن: مەتین

پشتی رێککەفتنا بەروەخت یا د ناڤبەرا هەرێما کوردستانێ و ئیراقێ دا، بسپۆرێن کەرتێ پەترۆلێ و ئابووریێ وەسا دبینن دڤێت هەر زوی یاسا یا نەفت و غازێ ل جڤاتا نوینەرێن ئیراقێ دەرکەڤیت، چونکی پڕانییا داهاتێ ئیراقێ ژ پەترۆلێ دهێت و هەتا نها ژی ل ئیراقێ یاسا یا یا نەفت و غازێ نینە، ئەو ئێک بوویە ئەگەرێ سەهلدانا ئاریشێن مەزن د ناڤبەرا هەرێما کوردستانێ و ئیراقێ دا، ژ بەر هندێ ژی پشتی نێزیکبوونا هەولێر و بەغدایێ، نها زەمینەکا باش هاتییە پێش و ب دەرخستنا یاسائێکا وەسا گرنگ دێ پڕانییا ئاریشێن هەیی هێنە چارەسەرکرن و هەکە یاسا یا نەفت و غازێ ل جڤاتا نوینەرێن ئیراقێ دەرکەڤت چ مەترسی ل سەر کەرتێ پەترۆلا هەرێما کوردستانێ ژی نامینن.

گۆلیزار سندی جێگرا سەرۆکێ لیژنا وزێ و سامانێن سروشتی ل پەرلەمانێ کوردستانێ سەبارەت ب نێزیکبوونا هەولێر و بەغدا ل دۆر کەرتێ پەترۆلێ دیار کر: «بەری هەر تشتەکێ ئەو رێککەفتنا بەروەخت یا سەبارەت ب هنارتنا پەترۆلا هەرێما کوردستانێ د ناڤبەرا بەغدا و هەولێرێ دا هاتییە کرن پێنگاڤەک  گەلەک باش بوو، چونکی نها پتر ژ هەر دەمەکێ هەولێر و بەغدا نێزیکی هەڤدو بووینە و هەر دو ئالییان ژی دڤێت ب رێیا هندەک ئالییەتێن نوی پرسا پەترۆلێ، کو چەندین سالە بوویە ئاریشەکا مەزن د ناڤبەرا مە و بەغدا دا چارەسەر بکەن، ژ بەر هندێ ژی ئەوا بەری دەمەکێ هاتییە کرن گەلەک گرنگ بوو، چونکی هەتا نها یاسا یا یا نەفت و غازێ ل ئیراقێ نینە و هەرێما کوردستانێ ژی ل گۆر دستووری ئەو مافە هەبوویە د کەرتێ پەترۆلێ دا وەبەرهێنانێ بکەت، لێ ژ بەر نەبوونا یاسا یا نەفت و غازێ هەتا نها ئاریشە د ناڤبەرا هەولێر و بەغدا دا هەبووینە و ئەم هێڤیدارین رێککەفتنا بەروەخت یا د ناڤبەرا هەولێر و بەغدایێ دا ببیتە رێکخۆشکەر ژ بۆ چارەسەرکرنا ئاریشا پەترۆلێ، چونکی ئاشکرایە ژ بەر ناکۆکیێن د کەرتێ پەترۆلێ یێ د ناڤبەرا مە و بەغدا دا گەلەک ئاریشێن دی ژی دروست بوون، ئانکۆ ب کورتی دشێم بێژم ژ بەر ئاریشێن مە یێن د بیاڤێ پەترۆلێ دا ل گەل بەغدا ئاریشێن دی یێن سیاسی ژی زێدەتر بوون».

جێگرا سەرۆکێ لیژنا وزێ و سامانێن سروشتی ل پەرلەمانێ کوردستانێ ئەو ئێک ژی دیار کر: «بێگومان هەولێر و بەغدا پێدڤی ب هندێ نە، کو ب رێیا رێککەفتنەکا دی هەمی ئاریشێن گرێدایی ب نەفت و غازێ د ناڤبەرا خۆ دا چارەسەر بکەن، ئەز وەسا دبینم ئەو رێککەفتنا بەروەخت دێ بیتە بناغەکا باش دا کار بۆ دەرخستنا یاسا یا یا نەفت و غازێ بهێتە کرن، چونکی هەتا یاسا یا یا نەفت و غازێ ل جڤاتا نوینەرێن ئیراقێ نەهێتە دەرخستن و هەمی مافێن هەرێما کوردستانێ د وی یاسایی دا نەهێنە گەرەنتیکرن دێ ئەو ئاریشە دیسان دوبارە بن، چونکی هەرێما کوردستانێ ل گۆر دستوورێ ئیراقێ سەرەدەریێ ل گەل کەرتێ پەترۆلێ کریە، لێ حوکمەتا فیدرال دڤێت ئاستەنگییان دروست بکەت، ژ بەر هندێ ژی نها نێزیکبوونەکا باش یا هەی و دڤێت کار ل سەر هندێ بهێتە کرن دا رێککەفتنەکا دی یا دەمدرێژ بهێتە کرن، بێگومان هەکە یاسا یا یا نەفت و غازێ دەرکەڤیت ئێدی چ مەترسی ل سەر کەرتێ پەترۆلا هەرێما کوردستانێ نامینن، رێککەفتنا بەری دەمەکێ ژی د راستی دا دانپێدانەکا بەغدایە و وی مافی ژی ددەتە هەرێما کوردستانێ دا کار ل سەر دەرئینان و فرۆشتنا پەترۆلا خۆ بکەت، راستە هندەک ئالییەت هاتنە گوهۆڕین لێ بەغدا ژی دزانیت نەشێت ئاستەنگییان دروست بکەت، چونکی نها بەرپرسێن بەغدا ژی دبێژن هەکە فرۆشتنا نەفتا هەرێما کوردستانێ بهێتە راگرتن دێ زیان بەر هەمی ئیراقێ کەڤیت، واتە د بەرژەوەندییا ئیراقێ دایە هاریکارییا هەرێما کوردستانێ بکەت دا پەترۆلا خۆ بێی ئاریشە بفرۆشیت، ژ بەر هندێ ژی ب دەرخستنا یاسا یا یا نەفت و غازێ دێ پڕانییا ئاریشێن هەیی هێنە چارەسەرکرن».

گۆلیزار سندی د پشکەکا دی ئاخڤتنا خۆ دا ئەو ئێک ژی دیار کر: «بێگومان دەمێ ئاریشێن د بیاڤێ پەترۆلێ دا بهێنە چارەسەرکرن دێ هەم هەولێر مفادار بیت و هەم ژی بەغدا، ئانکۆ بەرژەوەندیێن هەڤپشک یێن هەردو حکومەتان نها د هندێ دایە پێکڤە ل سەر ئالییەتەکا نوی کار بکەن و هنارتنا پەترۆلێ ژی بێگومان دێ بیتە ئەگەرێ بهێزبوونا ئابوورێ ئیراقێ و ئەو ئێک بۆ هەرێما کوردستانێ ژی دێ گەلەک یا باش بیت، چونکی ژ بلی کەرتێ پەترۆلێ مە وەکو هەرێما کوردستانێ گەلەک ئاریشێن دی ژی ل گەل بەغدا هەنە، رێککەفتن و نێزیکبوونا هەولێر و بەغدا سەبارەت ب چارەسەرکرنا ئاریشا پەترۆلێ دشێت ببیتە دەستپێکەکا نوی بۆ چارەسەرکرنا هەمی ئاریشێن دی یێن د ناڤبەرا هەرێما کوردستانێ و ئیراقێ دا».

ناڤهاتیێ د دویماهییا ئاخڤتنا خۆ دا ئەو ئێک ژی نەڤەشارت: «گەلەک یا گرنگە رێککەفتنا بەروەخت وەکو هاتیە کرن بەردەوام بیت، ژ بۆ هندێ ژی پێدڤیە هەر زوی یاسا یا یا نەفت و غازێ ل جڤاتا نوینەرێن ئیراقێ دەرکەڤیت، چونکی نەبوونا یاسایەکا وەسا گرنگ ل ئیراقێ دشێت ببیتە ئەگەرێ هندێ بەردەوام ئاریشێن سەبارەت ب کەرتێ پەترۆلێ د ناڤبەرا هەولێر و بەغدایێ دا بەردەوام بن، ژ بەر هندێ ژی گەلەک یا گرنگ د زویرین دەم دا کار بۆ دەرخستنا یاسا یا یا نەفت و غازێ بهێتە کرن، خالەکا دی یا گەلەک گرنگ ژی چونکی نها رێککەفتنەکا بەروەخت هاتەکرن، ئەو ئێک دێ بیتە پشتەڤانییەکا گەلەک باش بۆ پەرلەمانتارێن کورد ل بەغدا دا بشێن ب رێیێن قانوونی بەرەڤانیێ ل مافێن رەوا یێن گەلێ کوردستانێ بکەن».

د. بێوار خنسی راوێژكارێ سەرۆكێ حكومەتا هەرێما كوردستانێ بۆ كاروبارێن وزەیێ ژی راگەهاند: «ئیراق وەلاتەک گەلەک دەولەمەندە ب پەترۆلێ، داهاتێ ئیراقێ پتر ٩٠% ژ پەترۆلێ دهێت، لێ مخابن هەتا نها یاسا یا یا نەفت و غازێ ل ئیراقێ نینە، سالا ٢٠٠٧ێ کار بۆ درەخستنا یاسا یا یا نەفت و غازێ ل ئیراقێ هاتە کرن، لێ ژ بەر هندەک ناکۆکیێن سیاسی ئاستەنگ خستەنە پێش و ئەو یاسا یا یا وەسا گرنگ نەهاتە دەرخستن، چونکی یاسا یا یا نەفت و غازێ پشتی سالا ٢٠٠٣ێ، کو سیستەمێ ئیراقێ بوویە فیدرالی نەهاتییە دەرخستن، حکومەت ژی کار ب یاسا یا یا بەری سالا ٢٠٠٣ دکەت، ئەو ئێک ژی بوویە ئەگەرێ رویدانا ئاریشێن مەزن د ناڤبەرا مە و بەغدایێ دا، ب تایبەتی ژی ل دۆر کەرتێ پەترۆلێ، ژ بەر هندێ ژی پێدڤییا ئیراقێ بلەز ب دەرخستنا یاسا یا یا نەفت و غازێ یا هەی، راستە بەری نها ئاستەنگی هەبوون لێ ئەز وەسا دبینم پشتی گوهۆڕینێن ڤێ دویماهیێ و نێزیکبوونا هەولێر و بەغدایێ، زەمینەکا گونجایی هاتیە پێش و ئیراق نها دشێت ببیتە خۆدانا یاسا یا یا نەفت و غازێ».

د. بێواری ئەو ئێک ژی خۆیا کر: «دەمی سودانی وەکو سەرۆک وەزیران دەستبکارێ خۆ کری، بۆ وی دیار کربوو گەندەلیێن گەلەک مەزن د کەرتێ پەترۆلێ دا هاتینە کرن، ئیراق وەلاتەک گەلەک دەولەمەندە و خۆدانا داهاتەکێ گەلەک باشە، لێ ئەم دبینین رێژا هەژاریێ و بێکاریێ ل ئیراقێ رۆژ ب رۆژێ زێدەتر لێ دهێت، خەلکێ ئیراقێ ژی ڤێ ئێکێ قەبویل ناکەن، سودانی باش دزانیت هەکە چاکسازیێن پێدڤی د کەرتێ پەترۆلێ دا نەکەت دێ جارەکا دی خەلک دەست ب خوەنیشادانان کەن، بابەت تنێ گرێدایی ب ئاریشێن پەترۆلێ ل گەل هەرێما کوردستانێ نینە، بابەت ئەوە دڤێت ئیراقێ یاسا یا یا خۆ یا نەفت و غازێ هەبیت دا ل گۆر هندێ ژی کار بهێتە کرن، دڤێت حکومەت خزمەتا خەلکی بکەت، مخابن ل وەلاتەکێ وەکو ئیراقێ نها ئاستێ خزمەتگوزاریان گەلەک کێمە، ل گەلەک دەڤەران ئاڤا ڤەخوارنێ نینە، ئەو ئێک کارەساتەک مەزنە، ژ بەر ڤان خالان و گەلەک ئەگەرێن دی ژی بێگومان سودانی دڤێت دەست ب قۆناغەکا نوی بکەت، سودانی ژی باش دزانیت هەکە بڤێت د کەرتێ پەترۆلێ دا چاکسازییان بکەت دڤێت بەری هەر تشتەکێ یاسا یا یا نەفت و غازێ دەرکەڤیت».

ناڤهاتی د دویماهیا ئاخڤتنا خۆ دا ئاماژە ب هندێ ژی کر: «ئەز وەسا دبینم پشتی پەسەندکرنا بۆدجەی ل پەرلەمانی دێ کار بۆ دەرخستنا یاسا یا یا نەفت و غازێ هێتە کرن، ئەو یاسایە بۆ هەموو ئیراقێ گرنگە، یا ئێکێ دێ بیتە پالدەرەک باش بۆ چارەسەرکرنا ئاریشێن هەی د ناڤبەرا هەولێر و بەغدایێ دا، چونکی ئەم باش دزانین ژ بەر ئاریشێن د کەرتێ پەترۆلێ دا ئاریشێن سیاسی ژی د ناڤبەرا هەولێر و بەغدایێ دا زێدەتر لێ هاتینە، هەکە ئاریشا پەترۆلێ چارەسەر ببیت دێ گەلەک ئاریشێن دی ژی هێنە چارەسەرکرن، ئەو ئێک داخوازییا هەمی وەلاتیێن ئیراقێ یە، چونکی دەمێ ئاریشە بهێنە چارەسەرکرن وی دەمی حکومەت دێ پتر ب ئەرکێ خۆ رابیت و خزمەتا خەلکی کەت، براستی ژی دەم یێ هاتی ئیراق وەکو دەولەتەکا فیدرالی بهێتە برێڤەبرن، نابیت هەمی دەستهەلات د دەستێ کەسەکێ ب تنێ دا بیت، دڤێت ئیراق ب رێیا یاسایان بهێتە برێڤەبرن، ئێک ژ وان یاسایێن گەلەک گرنگ ژی یاسا یا یا نەفت و غازێ یە».

ل ئالیێ دی بەشیر یوسف ئابووریناس و مامۆستایێ زانکۆیێ ژی راگەهاند: «نێزیکبوونا هەرێما کوردستانێ و بەغدا سەبارەت ب فرۆشتنا پەترۆلا هەرێما کوردستانێ ب سەرێ خۆ تشتەک مەزنە، چونکی دانپێدانەکە ژ ئالیێ بەغدا ڤە ب سەروەریا هەرێما کوردستانێ، ئانکۆ بەغدا وی مافی ددەتە هەرێما کوردستانێ د کەرتێ پەترۆلێ دا کار بکەت، ئەو ئێک ژی بۆ هەرێما کوردستانێ گەلەک گرنگە، رێککەفتنا بەروەخت یا ل گەل بەغدا دێ ئەنجامێن خۆ یێن گەلەک باش بۆ هەرێما کوردستانێ هەبن، ئەو ئێک دێ بیتە ئەگەرێ بهێزبوونا ئابوورێ هەرێما کوردستانێ، چونکی نها چ ئاستەنگی ل هەمبەر دەرخستن و فرۆشتا پەترۆلا هەرێما کوردستانێ دا نەمان، نها تنێ تشتا بهێتە کرن ئەوە یاسا یا یا نەفت و غازێ ل جڤاتا نوینەرێن ئیراقێ دەرکەڤیت دا ئاستەنگیێن بەری چەند سالان بۆ هەرێما کوردستانێ هاتنە دروست کرن، ئەو ئاستەنگی جارەکا دی دروست نەبن، هاتنا بۆدجەکا وەسا مەزن بۆ هەرێما کوردستانێ دێ کاریگەرییەکا گەلەک مەزن ل سەر ئابوورێ هەرێما کوردستانێ هەبیت».

ناڤهاتی د پشکەکا دی یا ئاخڤتنا خۆ دا ئاماژە ب هندێ ژی کر: «هەرچەندە رێککەفتنا بەری دەمەکێ هاتییە کرن یا بەروەختە لێ ژ بۆ هەرێما کوردستانێ گەلەک گرنگە، چونکی ئەو رێککەفتنە دێ بیتە بناغە بۆ دەرخستنا یاسا یا یا نەفت و غازێ، ئیراقێ هەتا نها ژی یاسا یا یا نەفت و غازێ نینە، نەبوونا یاسائێکا وەسا گرنگ زیانا خۆ بۆ هەمی ئیراقێ هەیە، ب تایبەتی ژی بۆ هەرێما کوردستانێ هەیە، چونکی مە دیت د چەند سالێن بۆری دا هێزێن سیاسی یێن ئیراقێ بابەتێ پەترۆلێ وەکو کارتەکا سیاسی ل دژی هەرێما کوردستانێ بکارئینان، بۆدجێ هەرێما کوردستانێ ژ ئالیێ حکومەتا بەغدا ڤە هاتەبڕین، لێ دەمێ یاسا یا یا نەفت و غازێ ب فەرمی ژ پەرلەمانی دەرکەڤیت ئێدی چو مەترسیێن وەسا ل سەر پشکا هەرێما کوردستانێ د بۆدجێ ئیراقێ دا نامینن، ژ بەر هندێ ژی بابەتێ دەرخستنا یاسا یا نەفت و غازێ بۆ هەرێما کوردستانێ گەلەک گرنگە، چونکی وی دەمی چ ئاستەنگی ل هەمبەر هاتنا بۆدجەی بۆ هەولێرێ نامینن و هەرێما کوردستانێ دێ چیتە قۆناغەکا نوی یا گەشەپێدانا ئابووری و دێ رەوشا ئابووری یا هەرێما کوردستانێ گەلەک باشتر لێ هێت».

بەشیر یوسف ل دۆر مفایێن رێککەفتنا بەروەخت و نێزیکبوونا هەولێر و بەغدایێ بۆ هەرێما کوردستانێ ژی دیار کر: «نها رێژەکا باش یا پارەی وەکو بۆدجە بۆ هەرێما کوردستانێ د پرۆژە یاسا یا یا بۆدجەی دا هاتیە تەرخانکرن، کو ئەو ژی ١٦ ترلیۆن دینارێن ئیراقی نە، بێگومان پارەیەکێ گەلەک مەزنە و هەرێما کوردستانێ دشێت ب ساناهی مووچێن فەرمانبەران د دەمێ خۆ دا بدەت و هەروەسا پارەیەکێ مەزن ژی بۆ پرۆژان دمینیت، ئەو ئێک دێ بیتە ئەگەرێ دەستپێکرنا قۆناغەکا نوی یا گەشەپێدانا ئابووری، دێ کاریگەرییا خۆ یا باش ل سەر هەمی کەرتێن ژیانێ ل هەرێما کوردستانێ هەبیت، ژ بەر هندێ ژی نها وەلاتیێن هەرێما کوردستانێ ژ نێزیکبوونەکا وەسا یا د ناڤبەرا هەولێر و بەغدایێ دا دلخۆشن، دڤێت ئەم بزانین پەترۆل هەر یا ل هەرێما کوردستانێ، کەس پەترۆلا مە ژ مە وەرناگریت، دیسان دێ هەرێما کوردستانێ پەترۆلا خۆ دەرخینیت، تنێ ئالییەتا فرۆشتنێ هاتییە گوهۆڕین، بەری نها هەرێما کوردستانێ سەربخۆ دفرۆشت و ئاریشە ژی گەلەک بۆ هەرێما کوردستانێ دروست بوون، نها دێ کۆمپانییا سۆمۆ فرۆشیت و دێ داهاتەکێ باشتر ژ سالێن بۆری ژی کەڤیتە بەر دەستێ حکومەتا هەرێما کوردستانێ، ژ بەر هندێ ژی ئەز دبێژم قۆناغەکا نوی یا گەشەپێدانا ئابووری دێ دەستپێکەت و هەرێما کوردستانێ دێ شێت دەست ب پرۆژێن مەزن کەت».

ناڤهاتی د دویماهیا ئاخڤتنا خۆ دا ئاماژە ب هندێ ژی کر: «بەرپرسێن ئیراقێ ژی باش تێگەهشتینە بێی رێککەفتن ل گەل هەرێما کوردستانێ دێ هەردەم ئاریشە بۆ ئیراقێ ژی دروست بن، چونکی بۆرییا پەترۆلێ یا هەرێما کوردستانێ ژی دێ کەڤیتە د خزمەتا ئیراقێ دا و ئەو ئێک دێ بۆ ئیراقێ ژی گەلەک یا باش بیت، ئانکۆ نێزیکبوونا هەولێر و بەغدایێ و فرۆشتنا پەترۆلا هەرێما کوردستانێ ب رێیا کۆمپانییا سۆمۆ دێ بیتە ئەگەرێ بهێزبوونا ئابوورێ ئیراقێ و هەرێما کوردستانێ».

د. نەوزاد هێتوتی بسپۆرێ سیاسەتا دەرڤە یا ئەمریکا ژی راگەهاند: «هەر ژ رۆژا هنارتنا پەترۆلا هەرێما کوردستانێ هاتە راگرتن ئەمریکا هاتە سەرخەت دا هنارتنا پەترۆلا هەرێما کوردستانێ جارەکا دی دەستپێ بکەت، چونکی ئاریشا پەترۆلێ یا د ناڤبەرا هەرێما کوردستانێ و ئیراقێ دا زیانا خۆ بۆ ئەمریکا ژی هەبی، ئەم دزانین ژ بەر شەڕێ نها ل ئۆکرانیایێ و سزایێن، کو ئەمریکا ل سەر رۆسیا سەپاندینە بازارێ پەترۆلێ سەقامگیر نینە، ئەو ئێک د بەرژوەندییا ئەمریکا دا نینە، ژ بەر هندێ ژی بەری نها ئەمریکا فشار ل هەولێرێ و بەغدا دکرن دا هەر زوی دەست ب رێککەفتنەکێ بکەن، بەری نها ژ بۆ هندێ ژی دو شاندێن ئەمریکی سەرەدانا بەغدا و هەرێما کوردستانێ کرن و داخواز ژ هەر دو ئالییان هاتە کرن پرسێن هەی د ناڤبەرا خۆ دا چارەسەر بکەن، ب تایبەتی ژی پرسێن گرێدایی پەترۆلێ، ژ بەر هندێ ژی ئەمریکا ب فەرمی پشتەڤانییا خۆ بۆ هەر دو ئالییان دیار کر، چونکی ئەمریکا دڤێت هەرێما کوردستانێ و بەغدا هەمی ئاریشێن هەی ب رێیا دانوستاندنان چارەسەر بکەن».

د. نەوزادی ئەو ئێک ژی دیار کر: «ئەمریکا کار بۆ سەقامگیرییا بازارێ پەترۆلێ دکەت، ئەمریکا دڤێت بهایێ پەترۆلێ د بازارێن جیهانێ دا زێدە گران نەبیت، ژ بەر هندێ ژی ژ بۆ ئەمریکا گەلەک گرنگە هەرێما کوردستانێ و بەغدا بشێن ب رەنگەکێ بنگەهین ئاریشا پەترۆلێ د ناڤبەرا خۆ دا چارەسەر بکەن، بێگومان نها گەلەک ئاستەنگی ل هەمبەر دەرخستنا یاسا یا یا نەفت و غازێ ل ئیراقێ هەنە، لێ دڤێت بزانین یاسا یا یا نەفت و غازێ ژ بۆ ئیراقێ و هەرێما کوردستانێ ژی گەلەک گرنگە، چونکی ب دەرخستنا یاسایەکا وەسا دێ پڕانییا ئاریشێن سەبارەت ب کەرتێ پەترۆلێ هێنە چارەسەرکرن، بێگومان ئەو ئێک کارەک باشە و ئەمریکا ژی پشتەڤانیێ ل کارەکێ وەسا یێ قانوونی دکەت».

ناڤهاتی د دویماهییا ئاخڤتنا خۆ دا ئەو ئێک ژی ئاشکرا کر: «ئیراق و هەرێما کوردستانێ هەر دو ژی بۆ ئەمریکا گەلەک گرنگن، ئەمریکا هەردەم دڤێت هەولێر و بەغدا نێزیکی هەڤدو بن، چونکی ئەزموونێن چەندین سالێن بۆری سەلماندینە دەمێ ئاریشە د ناڤبەرا هەولێر و بەغدایێ دا هەبن ئەو ئێک کاریگەریئێکا خراب ل ستراتیژیا ئەمریکا ل دەڤەرێ دکەت، دەمێ ئالۆزی د ناڤبەرا هەولێر و بەغدایێ دا هەبن مەترسی بۆ بەرژەوەندیێن ئەمریکا ژی دروست دبن، ئەمریکا دەمەکە کار بۆ نێزیکبوونا هەولێر و بەغدایێ دکەت، نێزیکبوونا نها ژی گەلەک ب دلێ ئەمریکا یە، ژ بەر هندێ ژی بەرپرسێن ئەمریکا ب فەرمی پشتەڤانییا خۆ دیارکرن و هێڤی خواستن هەر دو ئالی ئانکۆ هەولێر و بەغدا دەست ب قۆناغەکا نوی بکەن و هەمی پرسێن هەی ب تایبەتی ژی پرسا پەترۆلێ چارەسەر بکەن».

Check Also

مـژارا خانی.. گەنج و ژیوار (مژارا هەیڤا نیسانا ساڵا 2024ێ)

بەرھەڤكرن: مەتین مژارا خانی، مژارەكا ڤەكری یا ھەیڤانەیە، ژ لایێ ناڤەندا خانی یا رەوشەنبیری و …