گۆڤارا مەتین گۆڤارا مەتین
سەرنڤیسەر
کۆڤارا (مەتین)، د خولا خۆ یا پێنجێ دا و پشتی دەربازبوونا ساڵەکێ، شییا (١٢) هژماران بێی گیرۆبوون بوەشینیت. د ڤێ خولێ دا، ستافێ کۆڤارێ یێ هەفت کەسی، بزاڤێن رژد کرن؛ داکو ب ستایل و شێوازەکێ نوی و سەردەمیانە، گەلەک مژاران، هەمبێز بکەت و (مەتین)ێ بکەتە ماڵا هەر پێنڤیسەکێ خودان شییان و بەهرە، چ ل کوردستانی یان ژی ژ دەرڤە. مە بۆ هەر (١٢) هژماران ژ (٢٣٣) هەتا (٢٤٤)، بیبلۆگرافییەک دروست کرییە، کو دێ ل گەل ڤێ هژمارێ بەڵاڤکەین.
ناڤێن نڤیسەران، بۆ ستافێ کۆڤارێ نەبوویە کێشە، چونکی بۆ مە ب تنێ ناڤەڕۆکا مژاران گرنگە، مژارێن باش، بێ دودلی مە بەڵاڤکرینە و یێن ب کێر بەڵاڤکرنێ نەهێن، مە رەت کرینە و چ جاران مە گڤاشتن و ماییتێکرن ژ کەسێ ژی نە پەژراندینە، بەرۆڤاژی مە ئامۆژگاری ب سینگەکێ فرەهـ وەرگرتینە. بۆ هندەک بابەتان، کو پێدڤی ب سەرراستکرنەڤا پێزانین هەبووینه، مە داخواز ژ نڤیسەران ب خۆ کرییە، داکو پێداچوونەڤێ د مژارێن خو دا بکەن.
ستافێ (مەتین)ێ، لایەنێ ئەلکترۆنی پشتگوهـ نەکرییە و گرنگییەکا باش پێ دایە. (مەتین)ێ پێگەهەکێ خۆ یێ تایبەت ل سەر تۆڕا ئینتەرنێتێ هەیە، کو تێدا بابەتێن د کۆپییا کاغەزی یا کۆڤارێ دا بەڵاڤ دبن، ئێک ئێکە و ل گۆری خانەیێن ماڵبەڕی دهێنە دانان، زیدەباری کۆپییا پی دی ئێف PDF یا هەر هژمارەکێ. هەروەسا، کۆڤارێ پەیجێن تایبەت یێن خۆ ل سوشیال میدیایێ ژی هەنە و د ئایندەیەکێ نزیک دا، دێ پویتەیەکێ پتر پێ هێتەدان.
ل سەر بنەمایێ “گوهۆڕین پێخەمەت باشترکرنێ” و پشتی بۆرینا ساڵەکێ ل سەر ڤێ خولا کۆڤارێ، مە د ڤێ هژمارا ل بەردەستێن وە دا – هژمارا (٢٤٥)ێ یا هەیڤا ئادارێ – مە ب باش زانی، لۆگۆ و رێژەیەکێ ژ دیزاینا ناڤەرۆکا (مەتین)ێ نەمازە دانانا مانشیتان ب رەنگەکی، کو ڤەڕێژا مژارێ ب کورتکری ب خۆڤە بگریت و ب رێکا وان، خواندەڤان بچیتە د نێڤ درێژاهییا بابەتی دا. پترییا گۆشە و دەرگەرهێن کۆڤاری ژی، دێ وەکی خۆ مینن.
داخوازا مە ژ نڤیسەرێن هێژا ئەوە، کا چەوا وان د ساڵا بۆری دا، (مەتین) ژ نڤیسینێن خۆ یێن گرانبها بێ بەهر نەکر، ل گەل مە د بەردەوام بن.
