گۆڤارا مەتین گۆڤارا مەتین
بەرهەڤکرن: مەتین
وەک وەفادارییەک، (مەتین) دێ د هەر هژمارەکێ دا، ئێک ژ دۆستێن کوردان، بۆ خواندەڤانێن خۆ دەتە نیاسین.
سۆزان میسیلاس وێنەگرەکا رۆژنامەڤانی و دۆکیۆمێنتاری یا ئەمریکی یا ناڤدارە، ل سالا 1948ێ هاتییە دنیایێ، ژ ب ناڤوده‌نگترين وێنەگرێن دۆکیۆمێنتاری یێن جیهانێ يه. ل سالا 1976ێ ببوو ئەندام ل ئاژانسا ماگنوم بۆ وێنەگرتنێ، ل ماوێ کارێ خۆ یا بەرفرەهـ، گەلەک خەلاتێن نێڤدەولەتی یێن ناڤدار وەرگرتن، ژ وانا: خەلاتا زێڕى یێ رۆبێرت کاپا و خەلاتێ هاسلبلاد، ب رێزگرتن بۆ کارێ وێ یێ بەرچاڤ د دۆکیۆمێنتکرنا پرسێن مافێن مرۆڤان و ناکۆکیێن سیاسی ل سەرانسەری جیهانێ.
میسیلاس گەشتا خۆ ل گەل دۆزا کوردی د دووماهيیێن سالێن هەشتێیان دا دەستپێکر، کو گەلەک سالێن ژیانا خۆ تەرخان کرن بۆ دۆکیۆمێنتکرنا دیرۆک و ژیانا گەلێ کورد. د ڤی سەردەمی دا، ل ناڤ دەڤەرێن کوردان گەریا، ب سەدان ديتن ل گەل تاکەکەسێن جڤاکا کوردی کرن، چیرۆک و ئەزموونێن وان ب کامێرا و پێنڤيسێ خۆ تۆمارکرن.
پەرتووکا وێ (کوردستان- د سیبەرا دیرۆکێ دا)، کارەکێ دۆکیۆمێنتاری یێ بەرفرەهە، کو وێنه‌يێن فۆتۆگرافی و شرۆڤەکرنا دیرۆکی یا دۆزا کوردی پێکڤە کۆمدکەت. پەرتووک بۆ جارا ئێکێ ل سالا 1997ێ هاتییە به‌لاڤكرن، بوو خالەکا وەرچەرخانێ د دۆکیۆمێنتکرنا دیرۆکا کوردی یا هەڤچەرخ دا.
