دارکۆ روندەک Darko Rundek

وەک وەفادارییەک، (مەتین) دێ د هەر هژمارەکێ دا، ئێک ژ دۆستێن کوردان، بۆ خواندەڤانێن خۆ دەتە نیاسین.

مه‌تین

هەلبەستڤان و ئەکتەر و سترانبێژەکێ رۆک Rock یێ کرواتی یە، ل 3 کانوونا دویێ یا ساڵا 1956ێ ل زەگریبا پایتەخت هاتییە دونیایێ.

ل دەستپێکا ساڵێن هەشتێیان چوویە د ناڤ جیهانا موزیکێ دا و ستایلێ رۆک هەلبژارتییە. پشتی جەنگا ناڤخۆ ل یۆگسڵاڤیا ل ساڵا 1991ێ سەرهلدای، بۆ فرەنسا کۆچکرییە.

هەتا نها هەشت ئەلبوومێن سترانان ل گەل موزیکژەنێن جودا جودایێن جیهانی تۆمارکرینە.

هەلبەستا «کوردستان» ب دەنگێ دارکۆ روندەک Darko Rundek ب زمانێ کرواتی وەکی سترانا دەستپێکێ، د ئەلبووما وی یا ب ناڤێ ) فرۆکەیەکا شین – Palvi Avion  ئەوا ل ساڵا 2010ێ هاتییە بەڵاڤکرن، خوانده‌ڤانێن مه‌تین دکارن ل سەر ڤی لینکێ ل خوارێ گوهدارییا سترانێ بکەن:

کوردستان

ژ نڤیسینا: دارکۆ روندەک  Darko Rundek

وەرگێران ژ ئنگلیزی: شەمال ئاکرەیی

دەما کو ستێر دبرسقین

ئەم ل سەر قەشایەکا تەنک برێڤە دچوون

هەر ئێکی ژ مە هیڤییەک د چاڤان دا هەبوو

لێ وێ تارییا ل دەردۆرا مە، نە هێلا ئەم بگەهین هیڤی یێن خۆ

خۆشتڤییا من یاا دوورە، یا ل پشت چیایان

رێکێن بەر ب دەرازینکا وێ وێڤە دچن، ب مایینان هاتینە چاندن

مە پشتی هەر توخیبەکی،

کامیۆن دگۆهارت

زەڵامێن گومان، کو رێنیشاندەرێن مە بوون

ب هەژمارتنا وان پارەیێن ژ مە وەرگرتین د مژوولبوون

ل پێش چاڤێن مە، خۆشترین خوارن دخوارن

بەرمایکێن خۆ ژی بۆ مە دهێلان

ئەوا دقەومیت و دبینم،

نکارم ب ساناهی بپەژرینم

رۆژەک دێ هێت

دێ بزڤڕم کوردستانێ

دێ ستووڤانکەکا ب مۆریک و مەرجان

بۆ ستوویێ تە یێ سپی ئینم

رۆژەک دێ هێت

دێ بزڤڕم کوردستانێ

ستووڤانکەکێ دێ ئینم

ستووڤانکەکێ دێ ئینم

ستووڤانکەکێ دێ ئینم

بۆ ستوویێ تە یێ سپی.

دو مۆریکێن

د نیڤا وێ ستووڤانکا درێژ دا

دێ ئەز و تۆ بین.

 

ژێدەر:

https://lyricstranslate.com/en/kurdistan-kurdistan.html

https://en.wikipedia.org/wiki/Darko_Rundek

Check Also

كریس كۆچیرا

وەک وەفادارییەک، (مەتین) دێ د هەر هژمارەکێ دا، ئێک ژ دۆستێن کوردان، بۆ خواندەڤانێن خۆ …