گەرەکە دوکیۆمێنتکرن ببیتە ئەرک

دوکیۆمێنتکرن، کو پشکەکا گرنگە ژ ڤەکۆلینا زانستی، پروسێسەکا کاریگەر و پێدڤی یە داکو داتا و زانیاری بھێنە بەرھەڤکرن و ڤاڤارتن و پاراستن و ل پاشەرۆژێ ببنە کەرستەیەکێ بەردەست ژ بۆ ئەنجامدانا ھەلسەنگاندنێن زانستی و کەتواری، داکو ل بەر سیناھییا وان مرۆڤ بکاریت رۆژەڤا خۆ ل سەر ئاڤا بکەت و ژبۆ دانانا پلانان و دارێشتنا نەخشەیێن پاشەرۆژێ بکاربینیت، چونکی ب رێکا دوکیۆمێنتکرن و ئەرشیفکرنێ کونترۆلا پێزانینان دھێتەکرن چ ئەو پێزانین یێن تێکستێن نڤیسی یان یێن تایپکری بن یان وێنە و تۆمارێن دەنگی و ڤیدیۆیی بن یان ژی پۆستێن ئەلکترونی بن..

مەرەما من ژ ڤێ (دیتن)ێ نە ئەوە داکو خوندەڤانێ ھێژا گرنگییا دوکیۆمێنتکرنێ بزانیت، بەلکو من دڤێت ڤێ بۆچوونا کورت بکەمە دەرگەھەک داکو داخوازەکێ بگەھینمە تەڤایا دەزگەھـ و سازییێن جودا جودا پێخەمەت گرنگییەکا باشتر بدەنە ڤێ پرۆسەیا گرنگ..

دویر نینە ژ خەمسارییا نە گرینگدانا بابکالێن مە ب ئەرشیفکرن و دوکیۆمێنتکرنێ، کو ھەر د کەڤن دا ئێک بوویە ژ ئێش و کێماسیێن مە، کارتێکرنەکا نەرێنێ ل سەر ئەڤرۆ یا مە کرییە و ئەگەر ل خۆ نەزڤڕین؛ رەنگە پرویشکێن وێ بگەهیتە سوبەھییا مە ژی، چونکی ئەم ھێشتا یێن ل سەر دەوسا زڕبەھرکرنا نفشێن بهێن ژ ئەرشیفێ ئەڤرۆ دچین، ھەر وەک نفشێن بەری مە، ئەم بێ بەھر کرین ژ ریژەیەکا بلند ژ بەرھەمێ ھزر و داھێنانێن خۆ بێ پارکرین، ئەگەر ئەوی بەرهەمێ ژ ئالیێ رۆژھەلاتناس و کوردناسێن بیانی ڤە گەھشتینە مە ژێ ڤەدەر کەین..

چێدبیت مرۆڤ بکاریت بەھانەیەکێ بدەتە نفشێن بەری خۆ، کو ب ئەگەرێ نەبوونا ئالاڤێن ئەڤرۆ ل بەر دەست و ژ بەر بارودۆخێ نەجهگیر و ئالۆزێ جڤاکی و سیاسی و کۆچ و راڤنان و ترس و ستەمێ، نەشیاینە ب رەنگەکێ ژ ھەژی بەرھەمێ ھزرا خۆ دوکیۆمێنت بکەن و ب پارێزن، لێ چما ئەڤرۆ، ئەڤرۆیا تەکنەلۆژیایێ، ئەم خەمساری و سستیێ بکەین..

ئێک ژ ساخلەتێن وەلاتێن پێشکەفتی، گرنگیدانا بێ سنورە ب دوکیۆمێنتکرن و ئەرشیفکرنێ.. دێ بینی، ل پەرتووکخانەیێن گشتی هەر کەسەک دکاریت ب ساناھی سەرھەلی ھەر رویدان و چالاکی و بزاڤەکا بەرییا دەهان سالان، ژ ھەر بیاڤەکێ ژیانێ، ببیت و مفای ژێ وەربگریت، ژ بلی ڤێ چەندێ ژی دانعەمرێن وان وەلاتان ژ بۆ خۆشییا بیرئانینان و سەرا پەرتووکخانەیان ددەن، داکو جارەکا دی خۆ و ھەڤالێن خۆ دبەرپەڕ و وێنە و دوکیۆمێنتێن، کو رەنگە بەرییا ٦٠ یان ٧٠ سالێن بۆری ھاتبنە تۆمارکرن ببینەڤە..

ڤان بابەتان ببینە

رەخنەیا ئەدەبی – هونەری و هەبوونا وێ ل دەڤەرێ

سەرنڤیسەر پێشڤەچوونا پرۆسەیا ئەدەبی – هونەری یا گرێدایە ب هەبوونا رەخنەیەکا رژد، چونکی نە د …