گۆڤارا مەتین گۆڤارا مەتین
سەرنڤیسەر
وەرگێڕان، ب تایبەتی وەرگێڕانا ئەدەبیاتان، ژ زمانێن بیانی یێن زیندی بۆ سەر زمانێ کوردی یێ شرین و بەروڤاژی، گرنگییەکا مەزن هەیە ژ بۆ پێشڤەبرنا رەوشەنبیرییا کوردی و زەنگینکرنا زمانی و بەرفرەهکرنا فەرهەنگا زمانێ کوردی، چونکی ل گوری پێدڤییێن ڤی سەردەمی دێ پەیڤێن نوی هێنە ئافراندن و دێ جهێ خۆ د زمانێ مە دا کەن، ئیدی زمان دێ ل گەل پێڤاژوویا رۆژەڤێ زیندی مینیت.
وەرگێڕان ب گشتی دێ کارتێکرنەکا ئەرێنی ل سەر تەڤایا بیاڤێن ژیانێ کەت و دێ ئاسۆیێن رەوشەنبیری یێن بەرفرەهتر بۆ تاکێ مە بەرپا بن. زێدەباری، کو وەرگێڕان دێ دەرگەهێن نوی هەمبەر خواندەڤانێ کورد ڤەکەت داکو سەرهەلی رەوشەنبیری و هزرێن جیهانێ ببیت، دەما بەرهەم و ڤەڕێژا ئەقل و ئەفراندنێن ملەتێن دی، دهێنە وەرگێڕان بۆ سەر زمانێ کوردی و بەردەست دبن، دێ ئیلهام و سرۆشەکێ دەتە نڤیسەرێن کورد داکو ئەو ژی بیاڤێ بەڵاڤکرنا ئەدەبیاتێن خۆ ژ چارچویڤێ لۆکال و ناڤخۆیی و بەرتەسک بەرفرەهتر لێ بکەن و بەر ب جیهانیبوونێ ڤە ببەن و کەرستە و ئاڵاڤ و شێواز و تەکنیکێن خۆ یێن نڤیسینێ ب نوییاتییێ وەرارێ پێ بدەن.
وەرگێڕان، نەمازە ژ زمانی کوردی بۆ سەر زمانێن بیانی یێن زیندی، دێ پرۆسەیا ناساندنا ناسنامە و چاند و ئەدەبییاتا کوردی بۆ جیهانێ باشتر لێ کەت. ئەڤ کارە دێ زمانێ کوردی زیندی هێلیت و دێ ڤەژەن و هێزەکا پتر ژێڕا پەخشیت داکو ل هەمبەر ئەسمیلەبوون و بهۆژتنێ خۆ رابگریت. ژ ئالییەکێ دی، وەرگێڕان دبیتە پرەکا بهێز د ناڤبەرا رەوشەنبیرییا کوردی و رەوشەنبیریێن گەلێن دی دا و دێ هاریکارییا پێکڤەژیانێ و ژ هەڤدوتێگەهشتنێ و خۆشڤییان و ئاشتییێ کەت.
دیسا، وەرگێڕان دێ یا هاریکار بیت داکو رەوشا وەشانخانە و بازاڕێ پەرتووکێ، گەش ببیتەڤە و دەلیڤەیێن کاری بۆ وەرگێڕ و نڤیسەران پتر پەیدا ببن.
ل ڤان ساڵێن دویماهیێ، تا رادەیەکێ، پرۆسەیا وەرگێڕانێ لڤینەک دروستکرییە؛ بەلێ مخابن، پترییا بزاڤێن هاتینە کرن د تاکە کەسی بووینە یان ل سەر ئاستێ پەرتووکفرۆشییەکێ بووینە. ئەڤ چەندە تێهنا وەرگێڕ و خواندەڤانێ مە ناشکێنیت، ب تایبەتی وەرگێڕان بۆ سەر زاراڤێ كرمانجییا ژووری (بەهدینی) گەلەک یا لەنگە ژ لایێ زمان و زمانەڤانییێ ڤە، لەوڕا ژ بۆ باشترکرنا ڤێ پرۆسەیێ، پێدڤییە هندەک پێنگاڤێن بلەز بهێنە هاڤێتن، ژ وانا:
- دامەزراندنا سەنتەرێن تایبەت ب وەرگێڕانێ.
- پێشکێشکرنا پشتەڤانییا دراڤى ژ بۆ وەرگێڕان.
- هاندانا چاپخانەیان ژ بۆ وەشاندنا بەرهەمێن وەرگێڕایی.
