پێکڤەژیانا ب ئاشتییانە.. بنەمایەکێ رەسەنێ کوردستانێ یە

سەرنڤیسەر

١٦ێ گوڵانێ یا هەر ساڵ، رۆژا جیهانی یا پێکڤەژیانا ب ئاشتی یە.

ل خۆلا ٧٢ێ یا کۆمەڵا گشتی یا نەتەوەیێن ئێکگرتی ل ٨ێ کانوونا ئێکێ یا ساڵا ٢٠١٧ێ، ب پڕانی (١٧٢ دەولەتان ژ ١٩٣ێ دەولەتێن ئەندام – ل وی دەمی)، پێشنیازا هەژمار (١٣٠/٧٢) پەسەند کر و بڕیار دا، کو رۆژا ١٦ێ گوڵانێ ل هەر ساڵ وەکو رۆژا جیهانی یا پێکڤەژیانا ب ئاشتی بهێتە دەستنیشانکرن.

 کۆمەڵەیا گشتی یا نەتەوەیێن ئێکگرتی داخواز ژ هەمی دەولەتێن ئەندام و دەزگەهێن سەر ب رێکخراوا  نەتەوەیێن ئێکگرتی و رێکخراوێن دی یێن نێڤدەولەتی و هەرێمی و جڤاکێ سڤیل کر، کو هەر ئێک ژ ئالییێ خۆڤە گرنگییێ ب ڤێ رۆژێ بدەن؛ داکو پێکڤەژیانا ب ئاشتی پتر ب هێز بکەڤیت.

پێکڤەژیان، تێگەهەکێ گرنگێ ژیانا مرۆڤایەتیێ یە، نەمازە ل وەڵاتێن پێکهاتێن جوداجودا یێن ئەتنی و ئایینی تێدا هەبن مینا کوردستانێ.

ل دێرین زەمان، کوردستان رووگەها گرۆپێن ئەتنیکی و ئایینی بوویە و لاندا پێکڤەژیانا وان بوویە، چونکی روحا لێبوورین و هەڤدو قەبوولکرنێ ل نک تاکێ کورد یا بەرچاڤ و بهێزە  و هەر تاکەکێ ل سەر ڤێ ئاخێ دژیت ل گور یاسایێ مافێن وی د پاراستینە و هیچ جوداهی د ناڤبەرا ئاکنجییێن هەرێما کوردستانێ دا نینە.

دەما ئەم ل رەوشا پێکڤەژیانێ ل پڕانییا وەڵاتێن هەڤسوی بنێڕین دێ بینین، کو ئەو وەڵات یێن نیمچە ڤاڵا بووین ژ پێکهاتێن وان یێن رەسەن و ئالیسەنگی ب تنێ بۆ پێکهاتەکا دەستنیشانکری، کو ل پڕانییا جاران لایەنێ دەستهەڵات د دەست دایە، کەفتییە!

دەما بەرپەڕێن دیرۆکا دوهی و ئەڤرۆ یا کوردستانێ ڤەبدەی، دێ بۆ مە خۆیا بیت، کو چ جاران کوردستان پشکەک نەبوویە ژ ئەڤێ چەوساندنا نوکە ل دەردۆرێ مە هەیی. هەر ل سەر دەمێ شێخ عەبدولسەلام بارزانی و هەتا شۆڕەشا ئیلونێ و پاشی ل سەردەمێ حکومەتا هەرێما کوردستانێ، دبینین هەمی نەتەوە و پێکهاتێن ئایینی کوردستانێ پەناگەها خۆ دبینن و هەردەما تووشی دەردەسەری و رەوشەکا نەخۆش دبن، بێ دودلی ئاراستەیا وان کوردستان بوویە.

مژارا پێکڤەژیانا ب ئاشتییانە ژ بۆ رەوشت و داب و نەریتێن کوردەواری، کو رەهێن خۆ د ناخێ گەلێ مە دا داهێلاینە، دزڤڕیت. لەوڕا هەر تاکەکێ کورد پێگێریێ و شانازیێ پێ دکەت و بوویە بنەمایەکێ رەسەنێ کوردستانێ.

Check Also

رەخنەیا ئەدەبی و راوەستییانەک

سەرنڤیسەر ل ڤان ساڵێن دویماهییێ، پێلەکا چاپکرنا کتێبان ل دەڤەرا مە سەرهلدایە، کو کارەکێ گەلەک …