مەتین هەرتم د خزمەتا نڤیسەر و ڤەکۆلەران دایە

سەرنڤیسەر

کۆڤارا مەتین، د بیاڤێ بەڵاڤکرنا پەیڤ و رەوشەنبیرییا ئاڤاکار دا، خودان ئەزموون و دیرۆکەکا دێرینە و هەردەم بزاڤکرینە، کو هەمبێزا وێ بۆ رەوشەنبیر، ئەکادیمیست، نڤیسەر و ڤەکۆلەران یا ڤەکری بیت؛ داکو بەرهەم ، مژار و ڤەڕیژا هزر و پێنڤیسێن خۆ بگەهیننە خواندەڤانان. لەوڕا ژی مەتین د قووناغا وەشانا خۆ یا پێنجێ دا، مینا قووناغێن دی، بزاڤێ دکەت، کو ل جهێ رەزامەندییا تەڤایا نڤیسەر و خواندەڤانان بیت.

کۆڤارا مەتین ھەرتم و د ھەمی قووناغێن خۆ یێن بۆری دا و د بیاڤێن جوداجودا دا، خودان ئاراستەیەکا رژد و ژێدەرەکێ پشتراستکری و کانییەکا زەلالا رەوشەنبیرییێ بوویە و تێھنا گەلەک ژ حەژێکەرێن خۆ پێگەهاندنێ شکاندییە و ژ وانڕا بوویە خالەکا گەھیبوون و پێگەھشتنێ و مەتین شییایە ببیتە ژێدەرەکێ زەنگین ژ بۆ وەرگرتنا نیڤشکەکێ ب مفا ژ چاند و کەلتۆرێ کوردی و جیهانی.

هەلبەت ب پشتەڤانییا ڤەکۆلەر و نڤیسەرێن ھێژا، کۆڤارا مەتین، ب ڤی کراسێ خۆ یێ نوی یا بوویە پرەکا موکۆم بۆ گەهاندنا ڤەڕێژا بیر و دیتن و ماندیبوونێن وان، کو د سەکۆ و مینبەرەکێ راستگۆ دا بەرچاڤی خواندەڤانێن خۆشتڤی دکەت و دلسۆزی و ئەمەکدارییا پشکداربوویان، ل گۆری شیانێن ل بەر دەست، نەھاتینە ژ بیرکرن.

ئەم وەکو ستافێ (مەتین)ێ، داخوازێ ژ قەلەمێن راستگۆ دکەین، کو ب پشکداریێن خۆ یێن ب سەنگ و مفاگەهین؛ (مەتین)ێ پتر دەولەمەندتر بکەن. مەتین پێخەمەت گەھاندنا مژار و ڤەرێژا کەدا ھزرکرنێن وە، دێ دەرگەھێن خۆ تاق هێلیت، داکو ئەم ھەمی بھەڤڕا پروسێسا پتر پێگەهاندن و ئاڤاکرنا مرۆڤێ کورد ژ ئالیێ مەعریفی و رەوشەنبیری ڤه‌، ببینە رێک و ئاوێزەک؛ داکو تاکێ کورد، بەر ب ژێیاتییەکا نیشتمانی یا موکۆمترڤە بچیت و ڤیانا کورد و کوردستانێ د ناخێ وی دا قاییمتر لێ بهێت و ئەم هەمی پێکەڤە هەردەم هاندەر بین بۆ دروستکرنا ئاسۆیەکێ کوردستانی یێ گەشتر.

یەزدانێ مەزن پشت و پەنایێ مە هەمییان بیت و کوردستان ھەر یا ئاڤا.

بابەتێن گرێدای

ڤان بابەتان ببینە
Close