ساڵ، ماڵئاڤاهی و پێشوازی!

سەرنڤیسەر

زانایێ فەلەکناسێ ئیتالی گالیلی گالیلۆ Galileo Galilei (١٥ی شوباتا ١٥٦٤ێ – ٨ێ کانوینا دویێ ١٦٤٢ێ) گۆتنەکا ناڤدار هەیە، کو هەرتم دگۆت “ لێ یێ دزڤڕیت –  ب ئیتالی  E pur si muove”. وی ئەڤ گۆتنە بەرییا پتر ژ ٤٠٠ ساڵان گۆتییە. هەلبەت مەبەستا وی “زڤڕینا ئەردی بوو ل دۆر رۆژێ”، کو دیتنەکا گەلەک جودا و ڤاڕێ بوو هەمبەر وێ باوەڕییا ل وی سەردەمی هەیی، ئەوا دگۆت “ رۆژ ل دۆر ئەردی دزڤڕیت” کو کەنیسێ پشتەڤانی لێ دکر و بەرۆڤاژییا وێ، هەر بۆچوونەکا دی، ب دەرچوون ژ ئایینی و بێباوەڕی دهەژمارت و سزایێ وێ کوشتن بوو!

مەرەما من ژ ڤێ بەراهیێ ئەوە، کو ساڵ ب تنێ بۆرینا دەمی یە و زێدەبوونا هەژمارەکێ یە ل سەر ساڵنامەیێ و ل سەر ژیێ مرۆڤی، یێ گەلەک کورت و چ تشتەکێ دی نینە.

ئەگەر مرۆڤ ل ڤان رۆژان، کو هەر ساڵ دوبارە دبیتەڤە، ل هندەک کەناڵێن تی ڤی و یۆتیۆبێ و سوشیاڵ میدیایێ ب گشتی بنێڕیت، دێ بینیت، کو کارێ خێڤزانک و فالڤەکەر و ئەو کەسێن پێشبینی و ئایندەی دخوینن زۆر دبیت و وی ل بابێ وی، حاشا وەکی پەیامبەران، پێشبینییا هندەک ژ رویدانێن هێشتا چێنەبوویی بکەت و سەرێن داڤێن چارەسەریێ بۆ چەند تەڵسم و گرێکێن ئالۆز ببینیت و خەلکەکێ زۆر ب خۆ و درەو و دەلەسەیێن خۆ ڤە مژویل بکەت.

دەستنیشانکرن و دانانا هەژمارا ساڵان د ساڵنامەیان دا، د بنیات دا ل گۆڕی دیتنێن هندەک کەسێن گرێدایی ب ئایینانڤە و تا رادەیەکێ د کەسوکی بووینە، کو ئەگەر پێڤاژوو و کاروانێ دیرۆکێ وەرچەرخانێن وێ ب هندەک رەنگێن دی بایە، دا مە هندەک ساڵنامەیێن دی یێن جودا هەبن ژ یێن هەیی.

بەلێ هەر چەوا بیت، دەما ئەم ماڵئاڤاهیێ ل ساڵەکێ دکەین و پێشوازیێ ل ساڵەکا دی دکەین، هەمی هیڤی و ئۆمێدێن مە ئەون، کو د ڤێ ساڵا نوی دا ئەڤ رەوشا مللەتێ مە تێدا بەر باشیێڤە بچیت و رۆناهییەکا زوی د تۆنێلا بەختێ کوردان دا خۆیا ببیت و کورد ژی مینا هەمی مللەتێن زیندی یێن جیهانێ ب رۆژا ئازادییا خۆ شاد بببیت.

سەرساڵ و هەمی دەمێن وە ب خۆشی و بەختەوەری بن.

بابەتێن گرێدای