عەبدولسەلام بەرواری: من ژی یا گوهلێ بووی کو لقێ ئێک، وەکی لقێت دی یێت پارتی گوڤارا خۆ هەبوو

پرسیارەک گەلەک جاران دهێتەکرن و هێشتا بەرسڤەکا دروست بۆ نینە: ئەرێ (کۆڤارا مەتین) یان (بەڵاڤۆکا مەتین) ل سەردەمێ شۆڕشا ئەیلوولێ هەبوو؟ پێزانینێن وە ل دۆر خولا ئێکێ یا مەتینێ و کەنگی دەرکەڤتییە چنە؟

بتنێ من ژی یا گولێ بووی، کو لقێ ئێک، وەکئ لقێت دی یێت پارتی گوڤارا خوە هەبوو و هەمی ب ناڤێ چیایەکێ دەڤەرا لقێ بوون، لقێ ئێک: مەتین، لقێ دو: سەفین، لقێ چار: ئەزمەر، یا لقێ سێ یێ کەرکووکێ بناڤێ (باباگورگور) بوو.

ل سەر دەمێ شۆرشا گوڵانێ، دوبارە مەتین هاتە وەشاندن، هندەک ژ بیرهاتنێن خۆ لگەل هەڤالێن هاتینە راسپاردن بۆ دەرئێخستنا مەتینێ بەحس بکە و ئەو هەڤال کی بوون؟

پشتی ئەز ل دویماهیا هەیڤا سێ سالا ١٩٨١ گەهشتیمە (کۆماتە) و مە دەستکرە گهورینا، ل هەیڤا پێنجێ بیروکا دەرکرنا بەلاڤوکەکێ ژی هاتە بەحس کرن  دا بگەهیتە رێکخراوێت پارتی نەخاسمە ئەوێت نهینی.

بۆچی ناڤێ وێ بوو (مەتین) و چەوا دهاتە بەرهەڤکرن و چاپکرن یان گەهاندن، یانکو بەڵاڤکرن؟

 – ناڤێ وێ بوو (مەتین) وەک بەردەوامیا دەرکرنا بەلاڤوکا لقێ ئێک.

شەهید (صبری بامەرنی) ئەرکێ تایپکرنێ وەرتگرت و (دکتور رزگار)ی ژی هندەک بابەت دنڤێسین، وەکی دی من ب خوە بابەت دنڤێسین و ئامادەدکرن دگەل دیزانیا بەرپەرا.

پارتیا باکوور و ب تایبەت (دکتور فەرهاد)ی ئەندامێ سەرکردایەتیێ گەلەک هاریکار بوون و ب رێکا وان مە رونیۆ و ئامیرێ تایپێ پەیدا کرن، هەروەسا ئەوان بۆ مە کاغەز و (ستێنسل)ێت رونیۆێ د ئینان مە لسەر کاغەزەکا (A3) تایپ دکر و ب رونیۆێ ژمارەکا باش چاپ دکر ود بوو بولاڤوکەکا چار بەرپەر و مە بۆ لیژنێت ناڤخو ڤرێدکرن دا بدەنە رێکخراوێت خوە یێت پێشمەرگا و ئەوێت نهێنی.

چەند دانە ژێ دهاتنە دەرکەڤتن، ئەگەر ل بیرا تە بیت ناڤەڕۆکا مەتینێ چ بابەت بخۆڤە دگرت؟

هندی ئەز ل کوماتە مایم، مە پێنج شەش دانە دەرئێخستن و پشتی ئەز ل هەیڤا یازدە ل لقێ نەمام، دکتور رزگاری بەردەوامی دا ب دەرئێسخستنا (مەتین)، لێ چەند دانە؟ ئەز نزانم.

مەرەم ژ دەرکرنا مەتین، بەلاڤکرنا بەیاننامێت سەرکردایەتی و هندەک ژ وتارێت ئیزگا دەنکێ کوردستانێ و دەنگوباس چالاکیێت پێشمەرکەی و روشەنبیریا سیاسی.

پشتی ڤێ راوەستیانا هەشت ساڵی، هوین چەوا ڤی پێنگاڤێ دبینن؟

پێهنگاڤەکا پیرۆزە و دەستخوەشیێ ل وە دکەم و باوەردکەم، دێ د سەرکەفتی بن ل خزمەتا ئەزمانێ کوردی و بەلاڤکرنا هزرا نەتەوی و نیشتیمانیا رێبازا بارزانی.

پێشنیارێن تە بۆ خۆلا نوی یا مەتینێ و دەستەیا وێ یا نوی چنە؟

هەکە لسەر رێبازا مەتینا بەرێ بچن، باشترین رێکە. یا ژ هەمی تشتی گرنکتر ل دەف من پاراستنا ئەزمانێ شرینێ مەیە وهیڤیدارم نەهێلن ئەو نەساخیا کوشندە یا پرانیا میدیا کوردی گرتی، وە ژی بگریت و وی ئەزمانێ سەقەتێ نەشرین ب کار نەئینن.

Check Also

جگاره‌… هه‌مى ژه‌هر و ئێشن..!!

ريپۆرتاژ: سينه‌م چێى جگاره‌كێشان (smoking)، هه‌لكێشانا دويكێلا تويتنێ يه‌ ب رێیا سيهێن مرۆڤى. تويتن وه‌ك …