سکرتێرێ (PDK) سوورییێ: دڤێت رێڤەبەرییەکا هەڤپشک ل رۆژئاڤایێ کوردستانێ بهێتە ئاڤاکرن

مەتین

سکرتێرێ پارتی دیموکرات کوردستان/ سوورییێ دیار دکەت، نها رەوشا رۆژئاڤایێ کوردستانێ گەلەک خرابە، ژ بەر هەبوونا پەکەکێ ژی تورکیا بەردەوام ئێرشی دەڤەرێن جودا جودا یێن رۆژئاڤایێ کوردستانێ دکەت، سیاسەتا شاش یا پەیەدێ وەسا کرییە گەلەک ژ کوردێن رۆژئاڤا کۆچبەر ببن، چونکی رەوشا ژیانا خەلکی گەلەک خرابە، وەکو چارەسەری ژی دڤێت کورد ل سوورییێ پرسا خۆ ل گەل شامێ چارەسەر بکەن، دڤێت کوردێن رۆژئاڤایێ کوردستانێ پەیوەندییێن خۆ ل گەل تورکیا باش بکەن، شەڕ و ئالۆزی د بەرژەوەندییا گەلێ مە دا نینە، هەروەسا ژ بۆ چارەسەرییا رەوشا نها یا ل رۆژئاڤایێ کوردستانێ ژی دڤێت رێڤەبەرییەکا هەڤپشک بهێتە ئاڤاکرن و هەموو هێزێن کوردی تێدا پشکدار بن، دەمەکە ئەمریکا ژی ڤێ داخوازییێ ژ هەموو هێزێن کوردی دکەت، لێ مخابن هەتا نها پەیەدە ئاستەنگییان دروست دکەت.

محەمەد ئیسماعیل سکرتێرێ پارتی دیموکراتی کوردستان/ سوورییێ د دیدارەکا تایبەت دا ل گەل کۆڤارا مەتین دیار کر: (بەری هەر تشتەکێ من دڤێت سوپاسیا ڤێ دەلیڤێ بکەم کو کۆڤارا مەتین بۆ مە روخساندییە، چونکی کۆڤارا مەتین جهەکێ خۆ یێ تایبەت ل دەف مە کوردێن رۆژئاڤایێ کوردستانێ هەیە، نها رۆژئاڤایێ کوردستانێ د قۆناغەکا تایبەت دایە، رەوشا گەلێ کورد ل رۆژئاڤایێ کوردستانێ گەلەک خرابە، چونکی هەر کەس دزانیت رێڤەبەریا نها ل وێرێ خۆ ل سەر خەلکێ مە فەرز کرییە، ژ بەر هندێ ژی نها گەلەک ئاریشە بۆ خەلکێ مە دروست کرینە، وەکو پارتی دیموکراتی کوردستان/ سوورییێ پشتی کۆنگرێ خۆ یێ ڤێ دویماهییێ مە بریار دایە د هەموو بیاڤان دا دەست ب قۆناغەکا نوی بکەین، چونکی پێدڤییا خەلکێ مە ب خەباتەکا نوی و نەتەوەیی یا هەی، د بیاڤێ سیاسی، دبلۆماسی و هەموو بیاڤێن دیتر دا مە دڤێت ئەم دەست ب کارەکێ مەزن بکەین و بێگومان ئارمانجا مە ژی ئەوە دا پێگەهێ کوردان ل رۆژئاڤایێ کوردستانێ و سوورییێ بهێز بکەین، ژ بۆ ڤێ یەکێ ژی مە دڤێت پەیوەندییێن خۆ ل گەل هەموو ئالییان بهێزتر لێ بکەین، ب تایبەتی ژی ل گەل ئالییێن ئۆپۆزسیۆنا سوورییێ، چونکی ئەو یەک بۆ دۆزا گەلێ مە گەلەک یا گرنگە، ئەڤرۆکە پتر ژ هەر دەمەکێ پێدڤییا گەلێ مە ب پشتەڤانییا جیهانی و هەرێمی یا هەی).

ناڤهاتی د پشکەکا دی یا ئاخڤتنا خۆ دا ئەو یەک ژی دیار کر: (ئەڤرۆکە ئەنجوومەنێ نشتیمانی یێ کوردی ل سوورییێ، کو نوینەراتییا خەلکێ مە یێ رۆژئاڤایێ کوردستانێ دکەت نەشێت وەکو پێدڤی ل رۆژئاڤایێ کوردستانێ کار و چالاکییان خۆ بکەت، چونکی فشارەکا زێدە ژ ئالییێ رێڤەبەرییا خۆسەر ل سەر هەڤالێن مە هەیە، فشارەکا زێدە ل سەر وان هێز و ئالییان هەیە یێن ئەڤرۆکە ل رۆژئاڤایێ کوردستانێ کار بۆ دۆزا رەوا یا گەلێ کورد دکەن، هەڤالێن مە هەموو کار بۆ مافێن نەتەوەیی یێن گەلێ کورد دکەن، لێ مخابن وەکو من گۆتی بەردەوام هەڤالێن مە دهێنە دەستەسەرکرن و هەتا نها ژی گەلەک ئاستەنگی ل هەمبەر کار و چالاکییێن مە یێن نەتەوەیی ل رۆژئاڤایێ کوردستانێ دروست دبن، ئەو یەک ژی ب چو رەنگەکێ ناهێتە قەبویلکرن، وەکو پارتی دیموکراتی کوردستان/ سوورییێ و ئالیێن نەتەوەیی ل رۆژئاڤایێ کوردستانێ زێدەباری هەموو گڤاشتنان ژی کار و خەباتا مە دێ بۆ بدەستڤەئینانا مافێن رەوا یێن گەلێ مە ل سوورییێ د بەردەوام بن، چونکی پێدڤیە کوردان رۆلەکا کاریگەر د پاشەرۆژا سوورییێ دا هەبیت، ژ بەر ڤێ یەکێ ژی ئەم دبێژین ئەڤ فشار و گڤاشتنێن هەیی چو کاریگەرییێ ل سەر خەباتا مە ناکەن، چونکی نها پتر ژ هەر دەمەکێ گەلێ کورد ل سوورییێ و رۆژئاڤایێ کوردستانێ هشیار بوویە و داخوازا مافێن خۆ یێن نەتەوەیی دکەت).

سکرتێرێ PDK/ سوورییێ د پشکەکا دی یا ئاخڤتنا خۆ دا ئاماژە ب دانوستاندنێن بەری نها د ناڤبەرا وان و پەیەدێ دا کر و دیار کر: (بەری نها ب ناڤبژیڤانیا ئەمریکا، فرەنسا، بریتانیا و هەروەسا سەرۆک بارزانی مە دەست ب قۆناغەکا نوی کر، وان هەموو ئالییان داخواز ژ مە و پەیەدێ کرن دەست ب دانوستاندنان بکەین، چونکی پێدڤییا کوردان ب ئێک هەلوەستییێ یا هەی، هەروەسا مە پێ باش بوو گۆتارا کوردی ژی ل رۆژئاڤایێ کوردستانێ یا ئێکگرتی بیت، دەمەکێ درێژ دانوستاندن د ناڤبەرا مە دا هاتنە کرن، ل سەر گەلەک بابەتان مە دانوستاندن کرن، ئارمانجا مە وەکو ئەنجوومەنێ نشتیمانی و پارتی دیموکراتی کوردستان/ سوورییێ ژی ئەو بوو دا کورد ل سوورییێ ئێکگرتی بن، دا د ئاستێ نێڤدەولەتی دا ئەم بشێین پێکڤە کارێن باش بکەین، ئارمانجا مە بدەستڤەئینانا مافێن نەتەوەیی یێن گەلێ مە ل سوورییێ بوو، لێ مخابن دیسان پەکەکی و پەیەدێ ئاستەنگی دروست کرن، وی دەمی ژی ل ئەمریکا هەلبژارتن هەبوون و د وان سێ مەهان دا بەرپرسێن ئەمریکی ژی مژویلی هەلبژارتنان بوون، د وان سێ مەهان دا مخابن پەیەدێ رەوش د بەرژەوەندییا خۆ دا بکارئینا و جارەکا دی ئێرشی بارەگایێن مە کرن، بارەگایێن مە سۆتن و گەلەک هەڤالێن مە هاتنە دەستەسەرکرن، ئەو یەک ژی بێگومان د خزمەتا خەباتا گەلێ مە دا ل رۆژئاڤایێ کوردستانێ دا نەبوو، پەیەدێ جارەکا دی شاشییەکا گەلەک مەزن کر، ئەو دەلیڤا هەی وان ژ هۆلێ راکر، مە وەکو ئەنجوومەنێ نشتیمانی یێ کوردی ل سوورییێ، مە گرنگییەکا گەلەک مەزن ددا وان دانوستاندنان، بۆ مە گەلەک گرنگ بوو کورد بشێن ل سووریێ ئێکگرتی بن و پێکڤە کار بکەن، ژ بۆ مە پێکڤە کارکرن بۆ مافێن نەتەوەیی یێن گەلێ کوردستانێ گەلەک گرنگ بوو، مە دخواست ئەو زەمینە د بەرژەوەندییا گەلێ مە دا بهێتە بکارئینان، لێ وەکو من گۆتی پەکەکێ و پەیەدێ رەوش هەموو خراب کرن و جارەکا دی ئالۆزی دروست کرن).

محەمەد ئیسماعیل ئاماژە ب ڤێ یەکێ ژی کر: (پشتی رەوشا رۆژئاڤایێ کوردستانێ ئالۆزتر لێ هاتی، مە وەکو ئەنجوومەنێ نشتیمانی یێ کوردی ل سوورییێ، مە شەش خال وەکو رێیا چارەسەرییێ پێشکێشی بەرپرسێن ئەمریکی و هەروەسا مەزلوم عەبدی فەرماندارێ گشتی یێ هێزێن سوورییا دیموکرات کر، هەر دو ئالیان ژی داخوازییێن مە قەبویل کرن و ئیمزا ژی کرن، لێ بەرپرسێن پەیەدێ پێگیری ب رێککەفتنان نەکرن، هەموو کورد دزانن بەری نها ل هەولێرێ و دهۆکێ ژی رێککەفتن د ناڤبەرا مە وەکو ئەنجوومەنێ نشتیمانی یێ کوردی ل سوورییێ و تەڤدەمێ دا هاتە ئیمزا کرن، لێ وان هەر وی دەمی پێگیری ب رێککەفتنان نەکرن و ئالۆزی دروست کرن، من دڤێت جارەکا دی بێژم، وەکو ئەنجوومەنێ نشتیمانی یێ کوردی ل سوورییێ ئەم هەردەم بۆ رێککەفتنا کوردی بەرهەڤین، مە دڤێت کورد د ناڤا خۆ دا ئێکگرتی بین و پێکڤە کار بکەن، ئارمانجا مە بهێزبوونا پێگەهێ کوردانە ل سوورییێ، لێ مخابن پەیەدە ئاستەنگی دروست کرن و نها ژی بەردەوام ئاستەنگییان دروست دکەت، شاندێ ئەمریکی و فرەنسی بەری نها د کۆمبوونێن د ناڤبەرا مە و پەیەدێ دا گەلەک جاران دیار کرینە، هەتا کورد ل سوورییێ د ناڤ خۆ دا ئێکگرتی نەبن و پێکڤە کار نەکەن رەوشا رۆژئاڤایێ کوردستانێ ژی یا ئارام نابیت، نها ئەمریکی ژی ژ رەوشا رۆژئاڤایێ کوردستانێ د رازی نینن، چونکی وان ژی دڤێت کورد بهێز بن دا بشێن کاریگەرییەکا مەزن ل شامێ بکەن، چونکی ئەمریکی دخوازن پێگەهێ کوردان ل سوورییێ بهێز کەڤیت و ئەو پشتەڤانییێ ل رێککەفتنەکا نوی د ناڤبەرا مە و پەیەدێ دا دکەن، لێ د رەوشا نها دا گەلەک یا ب زەحمەتە رێککەفتن بهێتە کرن).

سەبارەت رەوشا نها یا ل رۆژئاڤایێ کوردستانێ ژی سکرتێرێ پارتی دیموکراتی کوردستان/ سوورییێ گۆت: (نها رەوشا خەلکی باش نینە، ب تایبەتی ژی د بیاڤێ ئابووری دا نها رەوشەکا گەلەک خراب یا هەی، ئاستەنگییێن مەزن ل هەمبەر ژیانا وەلاتیان هەنە، رێڤەبەرییا نها نەشێت بەرسڤا داخوازییێن خەلکێ مە ل رۆژئاڤایێ کوردستانێ بدەت، هەروەسا رێڤەبەرییا نها ل رۆژئاڤایێ کوردستانێ خەلکێ مە گەلەک تەنگاڤ کرییە، سیستەمەک گەلەک هشک هەیە، ئەو سیستەم و تشتێ ئەو دبێژن و کار پێ دکەن ل گەل راستییا خەلکێ مە ناگونجیت، ژ بەر ڤێ یەکێ ژی دەمەکە رۆژانە خەلکێ مە ژ نەچارییێ رۆژئاڤایێ کوردستانێ جه دهێلن و بەرێ خۆ ددەنە ئۆرۆپا یان ژی جهەکێ دی، ئەو یەک ژی هەموو ژ ئەنجاما سیاسەتا شاش یا پەیەدێ بوویە، هەکە رەوش وەسا بەردەوام بیت دێ گەلەک دەڤەرێن کوردی یێن رۆژئاڤایێ کوردستانێ هێنە چۆلکرن، چونکی خەلک ژ سیاسەت و رەفتارێن پەیەدێ بێزار بووینە، دیارە وان دڤێت رۆژئاڤایێ کوردستانێ تنێ بۆ وان و هەڤالێن وان بمینیت، چونکی سەرەرای گازندێن مە و ئالییێن دی ل سەر رەفتارێن وان، لێ مخابن هەتا نها ژی ئەو ل سەر کریارێن خۆ د بەردەوامن، ئێرشێن ئەڤرۆکە یێن ل سەر رۆژئاڤایێ کوردستانێ ژی هەر ژ ئەنجاما وێ سیاسەتا شاش بوویە، ئەو سیاسەتا چەندین سالە رۆژئاڤایێ کوردستانێ دکەتە قوربانییا بەرژەوەندییێن وان یێن تەنگ، مخابن گەلێ مە ئەڤرۆکە ل رۆژئاڤایێ کوردستانێ بوویە قوربانییا وێ سیاسەتێ و سیاسەتا پەیەدێ ژی ب تەمامی ل دژی بەرژەوەندییێن نەتەوەیی یێن گەلێ کوردە ل سوورییێ).

ل دۆر ڤێ یەکێ کا پرۆژێ وان بۆ چارەسەرییا رەوشا نها یا ل رۆژئاڤایێ کوردستانێ چییە ژی ناڤهاتی گۆت: (دڤێت رێڤەبەرییەکا هەڤپشک ب پشکدارییا هەموو هێزێن کوردی و خەلکێن دی یێن ل رۆژئاڤایێ کوردستانێ دژین، بهێتە ئاڤاکرن. چونکی ئیدارا نها خۆ ل سەر خەلکێ مە فەرز کرییە و چەند سالن ژی نەشییاینە چو پرسەکێ چارەسەر بکەن، بەلکو پرسێن مەزن ژی بۆ خەلکێ مە دروست کرینە، ئەم ل سەر ڤێ باوەرییێ دانە هەکە رێڤەبەرییەکا وەسا بهێتە دروست کرن، دێ د ئاستێ نێڤدەولەتی دا ژی پشتەڤانییەکا مەزن بۆ کوردان ل سووریێ هەبیت، ئەو یەک دێ کاریگەرییا خۆ ل سەر سیاسەتا ئەمریکا و وەلاتێن دی کەت، ئانکۆ دێ ئەو پتر پشتەڤانییێ ل کوردان کەن، وی دەمی ل هەمبەر هەر ئێرشەکێ دێ کوردان پارێزن، لێ مخابن نها تشتەک وەسا نینە، ئانکۆ مە دڤێت کورد بخۆ ل سوورییێ خۆ برێڤە ببەن و مۆدێلەک نوی بهێتە ئاڤاکرن، ئەز ل سەر ڤێ باوەریێ مە، هەکە تشتەک وەسا بهێتە کرن دێ رەوشا رۆژئاڤایێ کوردستانێ یا ئارام بیت، دێ ئەو یەک ب دلێ خەلکێ مە بیت، وی دەمی ئێدی گەنجێن مە بەرێ خۆ نادەنە جهەکێ دی، دێ ل وەلاتێ خۆ مینن و دێ بۆ ئاڤەندانی و پێشڤەبرنا وەلاتێ خۆ کار کەن، ئەو یەک ژی نیشا ددەت پێدڤییا رۆژئاڤایێ کوردستانێ ب رێڤەبەرییەکا نوی یا هەی، چونکی نها هێزەکا چەکدار ب زۆرێ رۆژئاڤایێ کوردستانێ برێڤە دبەت، خەلک ژ رەفتارا وێ هێزێ رازی نینن، کۆچبەری و نەرازیبوونا گەلێ مە ل هەمبەر رەفتارێن وێ هێزێ ژی نیشا ددەت هەتا رەوش وەسا بیت کۆچبەری و ئالۆزییێن نها ژی دێ وەکو خۆ مینن و دێ دژوارتر ژی لێ هێت، ئەو یەک ب تەمامی ل دژی بەرژەوەندییێن نەتەوەیی یێن گەلێ مە نە، وەکو چارەسەری بێگومان دڤێت پەیەدە دەست ژ رەفتارێن خۆ یێن خراب ل دژی گەلێ مە بەردەت و رازی بیت دا د رێڤەبەرییەکا نوی دا جهـ بگریت، رێڤەبەرییەک نوو یا ب دلێ هەموو گەلێ کورد و خەلکێن دی یێن ل رۆژئاڤایێ کوردستانێ بیت، چونکی دڤێت ئەم ڤێ راستیێ قەبویل بکەین، خەلکێ مە رازی نینە ل ژێر سیستەمەک سەربازی دا بژیت، خەلکێ مە نها هەست ب ئارامییێ ناکەت و خەلک یێ نەرازیە و داخوازیێن خەلکێ مە هەنە، ژ بەر ڤان هەموو خالان ئەم دبێژین هەتا رێڤەبەرییەکا نوی ل رۆژئاڤایێ کوردستانێ نەهێتە دروست کرن، پرسێن هەی چارەسەر نابن، بەلکو دێ رەوش خرابتر لێ هێت).

سەبارەت ب سیاسەتا رۆسیا ل هەمبەر سوورییێ و پرسا کوردی ژی ناڤهاتی دیار کر: (ئاشکرایە هەبوونا رۆسیا ل سوورییێ بۆ پشتەڤانیا رژێما بەشار ئەسەدی یە، بەری نها رۆسیا پرۆژەیەک هەبوو ژ بۆ ئامادەکرنا دستوورەکێ نوو بۆ سوورییێ، پرۆژێ رۆسیا بۆ سووریایەک نوی تشتەک خراب نەبوو، هندەک خالێن باش تێدا هەبوون و د بەرژەوەندییا هەموو خەلکێ سوورییێ دا بوو، رۆسیا ب رەنگەکێ ژ رەنگان پشتەڤانییێ ل سووریایەک نوی دکەت، کو سیستەمێ وێ ناڤەندی نەبیت، ئانکۆ پشتەڤانییێ ل مافێن نەتەوەییێن دی ژی دکەت یێن ب سالانە ل سوورییێ دژین، د پرۆژێ سوورییێ دا بەحسێ مافێن کوردان ژی هاتە کرن، ئەو یەک تشتەک باش بوو، لێ د هەمان دەمی دا رۆسیا هەڤپەیمانە د گەل ئیرانێ و رژێما بەشاری و گرنگییەکا مەزن ددەنە هەڤپەیمانێن خۆ، ژ بەر ڤێ یەکێ ژی هەتا نها رۆسیا نەشیایە ئەو پرۆژێ بەحس ژێ دکر ل سووریێ بجه بینیت، ئاریشێن هەی ل سوورییێ هەتا نها وەکو خۆ بەردەوام دکەن و دژوارتر ژی بووینە، ئەو یەک ژی نیشا ددەت رۆسیا د پرۆژێ خۆ یێ بۆ سووریایەک نوی دا یا سەرکەفتی نەبوویە، بەرپرسێن رۆسیا دبێژن ژ بەر رۆلێ خراب یێ ئەمریکا و هێزێن دی وان نەشیاینە هەتا نها رەوشا سوورییێ ئارام بکەن، لێ رەوشەکا دی یا هەی، ئەو ژی هەتا نها نە رۆسیا و نە ژی رژێما بەشاری راستییا هەی قەبویل ناکەن و ل گۆر راستییا نها ل سوورییێ ژی وان چو پرۆژە نینن، کو ب دلێ هەموو نەتەوە و پێکهاتێن دی بن یێن ل سەر ئاخا سووریێ دژین، خالا دی ژی رۆسیا نها مژویلی شەڕێ ئۆکرانیایێ یە، ژ بەر ڤێ یەکێ نها رۆسیا وەکو جاران مژویلی بابەتێ سوورییێ نینە، چونکی رۆسیا ب هەموو هێزا خۆ شەڕێ ئۆکرانیایێ دکەت و ئەو یەک ژی کاریگەرییا خۆ ل سەر سیاسەت و پرۆژێن وێ ل سوورییێ یا کری، دڤێت ئەم ڤێ راستییێ ژی باش بدەینە بەرچاڤ، ژ بلی رۆسیا نها وەلاتێن دی یێن جیهانێ ژی وەکو جاران پرسا سوورییێ ناکەنە خالا هەری گرنگ یا کارێن خۆ، چونکی ژ بەر شەڕێ ل ئۆکرانیا هەڤسەنگییێن سیاسی ل ئاستێ جیهانێ هاتینە گوهۆڕین و هەر وەلاتەک ل گۆر بەرژەوەندییێن خۆ سەرەدەریێ ل گەل راستییا نها ل جیهانێ و دەڤەرا رۆژهەلاتا ناڤین دکەت).

سکرتێرێ پارتی دیموکراتی کوردستان/ سوورییێ د پشکەکا دی یا ئاخڤتنا خۆ دا بەحسێ هەبوونا ئەمریکا ل سوورییێ و رۆژئاڤایێ کوردستانێ کر و گۆت: (هەبوونا ئەمریکا ل سوورییێ گەلەک گرنگە، هەتا نها ژی بەرپرسێن ئەمریکی دیار دکەن ئەو دێ ل سووریێ مینن، ئانکۆ جارێ ئەمریکا نەڤێت هێزێن خۆ ژ ئاخا سوورییێ ڤەکێشیت، رەوشا وان دەڤەران یێن هێزێن ئەمریکا لێ هەنە، تا رادەیەکێ ئارامە، چونکی ژ بەر هێزێن ئەمریکا هەتا نها تورکیا دەست ب ئۆپەراسیۆنەکا ئەردی نەکریە، راستە ڤێ دویماهییێ ئێرشێن ئەسمانی دژوارتر بووینە لێ دیسان ژی ئەمریکا ئاستەنگییان دروست دکەت، هەروەسا ئەمریکا نەهێلایە هێزێن چەکدارێن سەر ب تورکیا ئێرشێن دەڤەرێن دی یێن رۆژئاڤایێ کوردستانێ بکەن، ئەو یەک ژی د بەرژەوەندییا گەلێ مە ل رۆژئاڤایێ کوردستانێ دایە، دڤێت ئەم ڤێ راستییێ بەرچاڤ بکەین هەکە هێزێن ئەمریکا ل رۆژئاڤایێ کوردستانێ نەمینن دێ مەترسییێن گەلەک مەزن ل سەر خەلکێ مە دروست بن، ڤێجا ئەو مەترسی چ ژ ئالییێ تورکیا بیت، یان ژی گرۆپێن چەکدار و ب تایبەتی ژی رژێما سوورییێ، ژ بەر ڤێ یەکێ ئەز دبێژم مانا هێزێن ئەمریکا ل رۆژئاڤایێ کوردستانێ بۆ خەلکێ مە گەلەک باشە، هەکە هێزێن ئەمریکا نەبان دا رەوشا رۆژئاڤایێ کوردستانێ گەلەک یا خراب بیت، ئەز باوەرم وی دەمی دا پرانییا دەڤەرێن جودا جودا یێن رۆژئاڤایێ کوردستانێ هێنە چۆلکرن، لێ مخابن ژ بەر ناکۆکییێن د ناڤبەرا مە و پەیەدێ دا هەتا نها وەکو کورد مە نەشیایە ئەم مفایەکا باش ژ هەبوونا ئەمریکا ل رۆژئاڤایێ کوردستانێ وەربگرین، هەکە کوردان ل رۆژئاڤایێ کوردستانێ سیاسەتەکا خۆ یا ئێکگرتی هەبا دا نها پێگەهێ کوردان ل سوورییێ گەلەک یا بهێز بیت، مخابن ژ بەر ناکۆکییێن ناڤخۆیی مە نەشیایە ئەم وەکو پێدڤی مفایێ ژ هەبوونا ئەمریکا ل رۆژئاڤایێ کوردستانێ وەربگرین، ئەمریکا پێ باشە کورد ل سووریێ سیستەمەک نوی و دیموکراتی دروست بکەن دا بیتە ئەزموونەکا باش و سەرکەفتی بۆ هەموو سوورییێ، لێ ژ بەر ناکۆکییێن د ناڤبەرا هێزێن کوردی دا هەتا نها ئەو یەک نەهاتییە کرن).

محەمەد ئیسماعیل د دویماهییا ئاخڤتنا خۆ دا سەبارەت ب ئێرشێن تورکیا یێن ل سەر رۆژئاڤایێ کوردستانێ ژی ئاماژە ب ڤێ یەکێ کر: (هەر کەس دزانیت بەهانا تورکیا یا بۆ ئێرشکرن ل سەر رۆژئاڤایێ کوردستانێ پەکەکە یە، هەکە پەکەکێ ل رۆژئاڤایێ کوردستانێ نەبا بێگومان تورکیا ژی چو بەهانە نەبوون، کو ئێرشی رۆژئاڤایێ کوردستانێ بکەت، بەری نها ژی مە گەلەک جاران گۆتیە، دڤێت شەڕێ پەکەکێ و تورکیا ل سەر ئاخا رۆژئاڤایێ کوردستانێ یان ژی هەرێما کوردستانێ نەهێتە کرن، دڤێت پەکەکە و تورکیا ل تورکیا و باکورێ کوردستانێ ئاریشێن خۆ چارەسەر بکەن، نابیت گەلێ مە ل هەرێما کوردستانێ و رۆژئاڤایێ کوردستانێ ببنە قوربانییا شەڕێ تورکیا و پەکەکێ، مخابن ژ بەر شەڕێ چەندین سالێن بۆری زیانێن گەلەک مەزن گەهشتینە گەلێ مە ل هەرێما کوردستانێ و رۆژئاڤا ژی، مە دڤێت وەکو کوردێن رۆژئاڤایێ کوردستانێ مە ژی سیاسەتەک وەکو یا هەرێما کوردستانێ ل گەل تورکیا هەبیت، چونکی دەمێ پەیوەندییێن رۆژئاڤایێ کوردستانێ ل گەل تورکیا د باش بن ئەو یەک د بەرژەوەندییا گەلێ مە دایە، چونکی ب شەڕی و ئۆپەراسیۆنێن سەربازی چو مفا ناگەهیتە گەلێ مە ل رۆژئاڤایێ کوردستانێ، وەکو کوردێن رۆژئاڤا مە ئاریشە ل گەل شامێ هەنە، دڤێت شام هەبوونا گەلێ مە قەبویل بکەت و کورد بگەهنە مافێن خۆ، پاشی ژی پەیوەندییێن مە ل گەل تورکیا و هەموو وەلاتێن دی دڤێت باش بن، ئەو یەک د بەرژەوەندییا مە دایە).